The Definitive Guide to Living in the Capital , Cairo , Egypt

الخروجات في القاهرة لها أشكال كتير، وكل شخص له ذوق مختلف عن التاني في الخروجة، اللي بيحبوا التمشية واللي بيحبوا الهواء الطلق، وهكذا. لكن الأساس اللي بيخلي أي خروجة مميزة هو جودة الأكل اللي هنأكله خلال اليوم، ومؤخرًا كنا في مول أركان بالشيخ زايد، ودخلنا مطعم “بلدينا” واللي له أكثر من فرع في القاهرة، وهنقول لكم على تجربتنا وتفاصيلها خلال السطور الجاية.

مول أركان موجود في الشيخ زايد ومساحته رهيبة للتمشية في ليل صيفي مميز وأول ماتدخلوا على الشمال هتلاقوا مطعم بلدينا اللي بيقدم أكل مصري من خير زمان، وهو فيه قعدة آوت دور وكمان مكان إن دور صغير مكيف، للناس اللي مش بتحب القعدة برة، وعندهم كراسي وترابيزات مودرن مميزة، ده غير كمان فريق العمل الخدوم والمبتسم دايمًا.

بدأنا تجربتنا بطبق شوربة لسان عصفور سعرها 55 جنيه، ورغم طعمها المميز بسبب البهارات الكتير إلا أن الكمية الصغيرة خلتنا متضايقين، وكمان طلبنا طبق مقبلات ساخن بسعر 280 جنيه، كان فيه كبيبة ضاني وكان طعمها حلو إلا أن مش كل الناس بيحبوا الضاني، وكبدة مقلية طعم الكزبرة كان واضح فيها، وسمبوسك جبن تحفة، وسمبوسك لحمة بدون تتبيلة ولا طعم، وورق عنب طعمه خطير.

دخلنا على الأطباق الرئيسية فتة موزة بالخل والثوم بـ350 جنيه، رغم أن العيش كان مش طري قوي إلا أن تتبيلة الصلصة تشفع لأي حاجة وكانت مظبوطة جدًا وأكتر حاجة عجبتنا، وكمان طلبنا طبق ميكس جريل 400 جرام كان سعره 415 جنيه، وللأسف ماكنش أفضل حاجة وماكنش فيها طعم ولا تتبيلة سواء للكباب أو الكفتة أو الفراخ، وحتى الريش كنا محتارين دي ريش ولا استيك مرهق، وكان معاها أرز بالشعرية وبطاطس بومفريت عاديين.

تجربتنا ماكنتش أفضل حاجة، ونقدر نقول إن المكان كان ناقصه شوية ملح علشان كل حاجة تبقى مظبوطة، ونتمنى أن المرة الجاية تكون أفضل ويكون تقييمنا أعلى من كده.

تقدروا تعرفوا أكتر عنهم عن طريق صفحة الفيسبوك من هنا.