The Definitive Guide to Living in the Capital , Cairo , Egypt

أنك تروح مكان بيقدم ساندويتشات سي فوود بأسعار معقولة في القاهرة غالبًا بييجي على حجم العيش أو كمية مكونات الساندويتش، كلنا عارفين شكل نص رغيف العيش البلدي، نصه بيكون جمبري صغير والنص التاني عيش حاف، والمكون الإضافي المعتاد اللي بيكون عليها هو الطحينة، بس لما تاكل سي فوود فريش ومخدوم وبكمية كبيرة في عيش فريش وسعره لطيف هي دي المعادلة الصعبة، وده اللي حققه مطعم “بلد الغريب” في مدينة نصر.

موجود في شارع محيي الدين عبد الحميد امتداد مكرم عبيد (جنب معهد الألسن)، المكان صغير عبارة عن 6 ترابيزات بكراسي وبتاكل في مكان مفتوح قريب من الشارع، عاملين ديكورات لطيفة عند الكاشير والدنيا بسيطة خالص، بس أهم حاجة لفتت انتباهنا هناك هو: السرعة في الخدمة، الطلبات كلها ما كانتش بتاخد وقت طويل، الساندويتشات عيش فرنساوي حجمين مختلفين والسعر موحد: حجم صغير سادة بـ 13 جنيه (بيتحط عليه طحينة بس)، وحجم كبير عليه سمسم بـ 45 جنيه (مكونات مختلفة).

أصحاب المكان، عندهم أنواع غريبة من السي فوود أول مرة نسمع اسمها زي الصرمباء والسرديا والدرجولا واللوجز، اللي عرفناه أن أصحاب المكان عندهم مراكب في السويس بيصطادوا الحاجة بنفسهم وبيجيبوها دايمًا فريش.

المنيو مافيهاش أقسام كتيرة، أول حاجة الساندويتشات: زي ما قلنا الحجم الأول الصغير بـ 13 جنيه، والحجم الكبير بـ 45 جنيه، وفيه قسم الشوربة: شوربة بقلويز (20 جنيه)، أو شوربة بلد الغريب (60 جنيه) ودي بتبقى ميكس سي فوود، وقسم المكرونات فيه 5 أنواع: مكرونة جمبري (صوص أبيض أو ليمون)، مكرونة سي فوود (صوص أبيض أو ليمون) ومكرونة بلح البحر، الطلب الجانبي الوحيد هو المخلل (3 جنيه)، ومياه غازية (6 جنيه).

الساندويتشات بتنزل في أطباق فويل متغطية بورق بلاستيك شفاف، طلبنا ساندويتش فيليه (13 جنيه)، الفيليه كان متقطع قطع صغيرة في الساندويتش وعليه طحينة، الساندويتش كان لطيف والسمك فريش بس ما حسيناش أوي بطعمه يمكن بسبب أن حجمه صغير، وبرضه أخدنا ساندويتش صوابع كابوريا (13 جنيه)، طعم الصوابع لوحدها لما ذقناها كانت رائعة بس الطحينة كان طعمها طاغي عليها.

ننقل بقى على الساندويتشات الحجم الكبير، أخدنا بيج زنجر (45 جنيه) مكون من جمبري مقلي مع صوص فرنسي وخيار مخلل وخس وجبنة شيدر حمراء، الساندويتش ده حلو جدًا، أولاً حجم الجمبري ضخم بمعنى الكلمة ومليان لحم ومش مزيت، المكونات فريش والشيدر كانت إضافة حلوة للطعم، ممكن الصوص الفرنسي والخس كانوا محتاجين يزيدوا شوية في رأينا، بس بشكل عام مكونات الساندويتش ده موفقة وفي الجون جدًا، جربنا كمان فاهيتا جمبري (45 جنيه) مكون من جمبري مشوي مع فلفل ألوان وزيتون وبصل وكاتشب مكسيكي، ألوانه لوحدها تفتح النفس، وبرضه حجم الجمبري ضخم جدًا، التسوية ممتازة والمكونات متوازنة وفريش والمكان نظيف طوال الوقت ومهتمين به.

في نهاية زيارتنا اتبسطنا جدًا أننا ما دفعناش مبلغ كبير جدًا على كل الطلبات دي وأكلنا أكل نظيف وفريش ومخدوم وسريع، نتمنى أن المكان يحافظ على المستوى ده من الخدمة ويتوسع ويفتح فروع تانية كمان لأنه بيقدم كواليتي كويسة. تقدروا تتابعوا صفحتهم على فيسبوك من هنا.