The Definitive Guide to Living in the Capital , Cairo , Egypt

كل فترة بيظهر مكان جديد بيحاول يقدم فكرة جديدة تميزه عن باقي الأماكن، وتجذب أكبر قدر من الناس، وده اللي حصل في “كرياكو” في التجمع الخامس واللي بيقدم أكل شعبي من اللي قلبك يحبه زي الممبار والكبدة والسجق.

المكان في شارع جانبي متفرع من شارع التسعين في التجمع الخامس، وفيه مكان خارجي تقعد فيه جنبه عربية فول من ديكورات رمضان، ومكان داخلي ديكوره مميز ما بين الكاميرات القديمة، والراديو القديم، وزجاجات الكوكاكولا، واسم كرياكو المميز في وشك أول ما بتدخل. مع كراسي زرقاء ومفرش مربعات أبيض في أزرق.

المنيو مليان ساندويتشات مختلفة ما بين الكبدة والسجق والرنجا والحوواشي بأنواعهم، ده غير طواجن المكرونة والرز  بأنواع مختلفة للكبدة والسجق.

طلبنا بطاطس سانتوريني (24 جنيه) وممبار (18 جنيه). وحبينا نجرب حاجة من الحلو فماكنش قدامنا إلا ساندوتش السكلانس المتين ( 18 جنيه).

الأكل جيه بسرعة بعد حوالي ربع ساعة، وكان سخن ومغري، البطاطس كانت متحمرة كويس ومش مزيتة، وعليها سجق مفروم مع بصل وفلفل وصلصلة، كان نفسنا البصل يكون مفروم ومتحمر أكتر علشان ما نحسش بطعمه بس بشكل عام كان الطعم كويس.

أما الممبار بقى فكان حكاية مشطشط وسخن ومش بيمط، وكنا هنطلب طبق تاني لولا إننا شبعنا.

بعد كده جيه وقت الحلو، والحقيقة إحنا مش من هواة السكلانس لأنه سكر مبالغ فيه بس فيه ناس كتير بتحبه، وهو عبارة عن رغيف فينو صغير بيتحط لك فيه قشطة وحلاوة ومربى وعسل، أكيد هنموت من التخمة بس كان طعمه حلو لولا إن الحلاوة كتير شوية.

كان نفسنا المكان يكون بيقدم عصائر فريش، لكن للأسف بيقدم مشروبات غازية بس، الواحد بـ 10 جنيه، لكن أكثر حاجة عجبتنا في المكان هي الديكورات اللي رجعتنا لوسط البلد في الستينيات وفكرتنا بالماضي.