The Definitive Guide to Living in the Capital , Cairo , Egypt

سنة 2015 شهدت طفرة كبيرة على ساحة المطاعم القاهرية، وشوفنا فيها ظهور أسماء كثيرة لها ثقلها، وكان من الطبيعي وسط المنافسة الشديدة أن أماكن تحقق نجاح أكثر من أماكن ثانية، والنهارده كلامنا عن مكان قدر يثبت نفسه وهو "إيتري – Eatery".

هو مش مجرد مطعم عادي، تقدر تعتبر إيتري مدرسة لتعليم الطبخ ومكان بـ يحقق حلم كل أكيل في مصر لأنه بـ يقدم فرصة حجز محطة طبخ في المطعم لتحضير الأكل -وطبعًا تاكل اللي عملته بنفسك- شوف "نصيحة كايرو 360" علشان تعرف أكثر.

المطعم الموجود في كايرو فيستيفال سيتي يتميز بديكورات بسيطة ورائحة التوابل والنباتات المزروعة هناك بـ تكسر الحاجز اللي بـ يفرق المطعم عن المطبخ، وبالتالي قدرت تقدم لنا تجربة فريدة ومختلفة، وطبعًا لازم نتكلم كمان عن شكل الحائط الرائع ومجموعة ماكينات قهوة illy.

بدأنا أكلتنا مع طبق مقبلات رقائق الأرز الملفوفة الفييتنامي Rice Paper Spring Rolls بـ (55 جنيه)، ومعاه طبق بيف بازل Beef Basil بـ (138 جنيه) ورافيولي محشي بالريكوتا والسبانخ Stuffed Ravioli with Ricotta and Spinach بـ (65 جنيه).

نبدأ كلامنا عن طبق المقبلات ونقول أن طعمه عجبنا جدًا وكان متنوع ودي حاجة هايلة بالنسبة لطبق فاتح للشهية، والحقيقة أن الأعشاب مع طعم النعناع القوي قدروا يعملوا طعم هايل، بس الجمبري ما كانش واخد حقه في الطبق، طبق رقائق الأرز بـ يُقدم على لوح من الحجر الأسود ومعاه نوعين من الصوص، واحد منهم صوص ترياكي والثاني خليط من الخل والبصل، والأثنين طعمهم كان رائع وعملوا شغل عالي مع الأعشاب الفريش الموجودة داخل الرقائق.

بعد البداية الهايلة كنا متوقعين نلاقي نفس الطعم المميز مع الأطباق الرئيسية، بس على العموم نقدر نقول أن الموضوع ما كانش محبط خالص، شكل تقديم الأكل كالعادة كان هايل، ووصل مع البيف أرز بجوز الهند طعمه رائع ويتميز بقوام خفيف ونكهة حليب جوز الهند أضافت نكهة مميزة، نتكلم شوية عن البيف نفسه، صحيح الريحان ما عملش الرائحة الرائعة المعروفة عنه، بس طعمه كان هايل مع الفلفل السبايسي، وكان ظاهر كمان مهارة الشيف في تقطيع اللحم لشرائح رفيعة متساوية ومستوية كويس بحيث تحتفظ بعصاريتها وطعمها اللذيذ.

المميز في إيتري كمان أنهم بـ يعملوا المكرونات فريش، وده دليل قوي على جودة المكان، أما الطبق الثاني فكان عبارة عن رافيولي طري رفيع ومحشي بالخلطة الإيطالية المعروفة من جبن الريكوتا والسبانخ، مع صوص مريمية بالزبدة قدر يزود من عظمة طعم الريكوتا والسبانخ الطازجة.

خلصنا أكلتنا مع طبق بانانا بريد Banana Bread بـ (65 جنيه) وكان واضح فيه دقة مطبخ إيتري في اختيار كل مكون من مكوناته قبل استخدامها، صحيح خبز البانانا الغني بنكهة الموز كان دسم شوية بس طعمه كان روعة، خصوصًا مع إضافة جبن الماسكربوني الغنية بالزبدة وطبعًا لازم نشكرهم على إضافة الكمثرى المسلوقة وعصير الفراولة اللذيذة.

عمومًا، نقدر نقول بكل أمانة أن تجربتنا في إيتري كانت شبه متكاملة، من الأجواء الرائعة والأكل الممتاز البسيط المتنفذ باحتراف لفريق العمل اللي قدم خدمة ممتازة.