The Definitive Guide to Living in the Capital , Cairo , Egypt

ميدان الحصري أو
“الحصري” زي ما كثير مننا بـ يسميه في مدينة السادس من أكتوبر مكان حيوي
جدًا، مش بس علشان فيه مطاعم أشكال وألوان لأ وكمان فيه محلات ومستشفى والجامعة وحاجات
ثانية كثيرة مش مخلية المكان يهدأ.. ده غير طبعًا غابة الميكروباصات اللي هناك
عاملة زحمة بصرية وسمعية مش قليلة.

من ضمن المطاعم اللي هناك «أرزاق
الكوثر» اللي له كمان 6 فروع ثانية في أماكن مختلفة منها: المعادي جراند مول، وطريق مصر حلوان الزراعي
في المعادي 2، ومدينة
نصر، والمنيل، وجامعة حلوان، وأخيرًا شارع العريش في الهرم.

أرزاق الكوثر بـ يقدم أكل مصري
صميم زي الفول (من 1.50 لحد 2.25 جنيه) والطعمية (من 1.50 لحد 3.50 جنيه)، حتى أن
الفول فيه منه الصعيدي ومنه السوري، وكمان بصارة مصرية (5.75 جنيه) ويا إما تطلبه
ساندويتش أو علبة، والأومليت بأنواع مختلفة (من 3.75 لحد 6.25 جنيه)، والباذنجان
الصعيدي (2.25 جنيه للساندويتش و5 جنيه للعلبة) والمسقعة (2.25 جنيه للساندويتش و5
جنيه للعلبة) وبابا غنوج (2.25 جنيه) وجبنة رومي مقلية (5.75 جنيه) وجبنة بيضاء
بالخلطة (2.75 جنيه) والكشري (بأحجام من 3 لحد 6.75 جنيه)، ده غير ساندويتشات
اللحوم والفراخ والجمبري والحواوشي (البلدي بـ 19.25 والإسكندراني بـ 20.25 جنيه) والطواجن
(بطاطس بالسجق وبيوريه باللحم المفروم ومكرونة كريمي باللحم المفروم ومكرونة سي
فوود)، هـ تلاقيهم حاطين على جروبهم
على الفيسبوك معلومات عن فوائد الفول والعدس والطماطم وحاجات ثانية كثيرة
لطيفة منهم وبالتالي دي بـ توصل رسالة أنهم مش بس مكان لتقديم أكل متميز وخلاص.

«أرزاق الكوثر» بدأوا بـ تقديم
أطباق (وجبات) مميزة من فترة (كاتبين أنها متوفرة بفرعي الهرم وأكتوبر فقط) وكمان
فيه “عروض التوفير” اللي برضه متوفرة في الفرعين دول فقط.

فيه 4 أنواع من الوجبات (عرض خاص
وسعر موحد 25 جنيه للوجبة الواحدة بدلاً من 28.75 جنيه): دجاج بصوص الكاري،
فاهيتا، طاووق، وفراخ بانيه، بـ ينزل معاها أرز وسلاطة خضراء وعيش ومشروب، وفي
عروض التوفير على وجبات الكومبو ” الكبدة الإسكندراني والبرجر” (بسعر 16
جنيه بدلاً من 19.25 جنيه) وكومبو فاهيتا الدجاج (20 بدلاً من 24.25 جنيه) والفراخ
الكريسبي (18 بدلاً من 22.25 جنيه).

جربنا كومبو الفراخ بالكاري، كان
طعمها كويس والأرز كان مستوي حلو والسلاطة الخضراء صابحة وطازجة وكمان جربنا ساندويتش
الكفتة المشوية المتوفر بحجم واحد M
(8.75 جنيه) الكفتة كانت رائعة ورائحتها كانت سابقة طعمها الحلو؟، اللي ضايقنا
شوية بس أنها كانت مليانة قطع بصل كثير وإحنا مش بـ نحبه كثير قوي، كمان طلبنا
ساندويتش بطاطس صوابع بالسلاطة (3 جنيه) كان حلو جدًا وألوان السلاطة فيه مبهجة بس
المفاجأة أنه جاء لنا فى نصف رغيف صغير جدًا، وده كان غريب لأنه ما كانش كده في
فرع المنيل بـ يكون رغيف كامل كبير عنه شوية.

وقت زيارتنا كانت الخدمة مش سريعة
قوي، المكان فيه ترابيزات عالية علشان تقعد تأكل عليها بالداخل لكن غير مريحة
وكانت رجلنا متعلقة طول الوقت فـ تعبنا، المكان حلو والأكل كمان، إحنا واثقين أن «أرزاق
الكوثر» هـ يقدروا يتغلبوا على العيب ده قريب إن شاء الله.