The Definitive Guide to Living in the Capital , Cairo , Egypt

رنا شرف

الزمالك مكان جميل، كل التفاصيل بتقول إنها منطقة مختلفة ومميزة في القاهرة! وحتى مطاعم الأكل هناك بنحس فيها بإحساس تاني. مؤخرًا اكتشفنا مكان جديد في الزمالك، وحبينا نشاركم تجربتنا معاه. المكان اسمه “أبو الزوز”، وهو بيقدم أكل صحي ولذيذ معمول علي الطريقة الشامية الأصلية.

جودة الأكل وطريقة تقديمه مميزة جدًا، سواء أطباق رئيسية أو مقبلات أو سلاطات. وحتي الحلويات ليها طعم غير.

في السطور الجاية هنشارككم تجربتنا الجديدة بالتفاصيل.

في الأول، مهم نوضح إن المكان فيه طاقة إيجابية جميلة، وده بيرجع للفيو اللي على النيل مباشرة، وهناك أنت بتقدر تختار مابين قعدة على النيل أو قعدة داخلية.

جربنا أول طبق وكان كباب هندي، وده سعره 180 جنيه، عبارة عن  كرات الكفتة مع بهارات وتسبيكة الصلصة مع البصل والفلفل الحار. فعلًا كان مميز! الطبق بينزل معاه أرز باللوز، وده اختراع بجد طعمه رائع جدًا.

تاني طبق جربناه كان من المقبلات، اسمه محمرة بالجبنة، وده طبق يكفي من فردين لتلات أفراد، وهو عبارة عن عجينة طرية وهشة مضاف ليها جبنة موتزاريلا عظيمة. حقيقي طعم الطبق رائع ومعمول على المظبوط، وسعر المحمرة 100 جنيه.

كمان لازم تجربوا هناك أكلة اسمها “شيش برك”، وهي تراث من المطبخ السوري، مكوناتها من الحليب والنشا والكزبرة الخضرا والناشفة. فعلًا كانت جميلة وطعمها مظبوط.

ومن المقبلات اللي ماينفعش ماتتجربش سلاطة الفريكة بالرمان والزبيب، ودي سعرها 250 جنيه، كمان جربنا “حراق أصبعو” ودي سلاطة من العدس الأسود والرمان والتوابل المميزة ومعاها قطع كريسبي لذيذة، ودي سعرها 100 جنيه.

ماكنش ينفع مانجربش الحلو. جربنا الأرز باللبن، حقيقي وهمي ومعمول بمياه الزهر والورد الشامي والزبيب والمكسرات اللذيذة، سعره 100 جنيه.