جربنا STARTERS المعادي: مقبلات شامية على كيفك
STARTERS أكل القاهرة الأكل الشامي التبولة دجلة المعادي فتة ورق العنب مراجعات المطاعم مطاعم المعادي مقبلات شامية
Cairo 360
الأكل بيحلى بالمقبلات.. شوية تبولة، أو فتوش، أو ورق عنب، أو حتى طبق حمص يفتح النفس قبل الأكلة الأساسية. ولو بتحب المقبلات الشامية وبتدور على مكان يقدمها بأسعار معقولة في المعادي، يبقى ممكن تحط STARTERS على قائمة الأماكن اللي تجربها.
STARTERS مكان متخصص في المقبلات والأكل الخفيف المستوحى من المطبخ الشامي، وفكرته ببساطة إنه يقدم أطباق متنوعة تنفع كوجبة خفيفة أو جنب أكلة تانية. المكان صغير، وأقرب في تصميمه لمطبخ متخصص في تجهيز الطلبات أكتر من كونه مطعم تقليدي، ودي نقطة مرتبطة بفكرته الأساسية اللي معتمدة بشكل كبير على الدليفري والتيك أواي.
المكان موجود في شارع 202 بدجلة المعادي، وقررنا نجرب طبقين من قائمته علشان نشوف الحكاية تستاهل ولا لأ.
فتة ورق العنب.. طعم بيتي بامتياز
أول حاجة طلبناها كانت فتة ورق العنب، ودي بصراحة كانت من أبرز مفاجآت التجربة. الطبق طعمه غني ومظبوط، وفيه إحساس بالأكل البيتي اللي معمول باهتمام، وده انعكس على تفاصيله.
ورق العنب طعمه واضح ومميز، وقطع اللحمة متقطعة بحجم صغير، وده ساعد إن المكونات كلها تتجانس مع بعض في كل لقمة. الطبق كمان مش مجرد شكل حلو، لكن مذاقه فعلا يستحق التجربة.
سعر فتة ورق العنب 330 جنيه، وبالنسبة لنا كانت من الأطباق اللي تستحق التجربة في STARTERS.
التبولة.. طبق متكامل مش مجرد سلطة
تاني اختيار كان التبولة، وهنا الموضوع كان مختلف شوية؛ لأن الطبق مش مجرد تبولة تقليدية، لكنه بييجي مع قطعة كبيبة وورق عنب وحمص بالصنوبر.
التبولة نفسها كانت ممتازة، كميتها مناسبة، ومكوناتها متظبطة بالطريقة اللي تتوقعها من الطبق الشامي المعروف. أما الحمص بالصنوبر فكان إضافة لطيفة، لكن الكبيبة تحديدا كنا نتمنى تكون أفضل شوية من ناحية الطعم.
سعر الطبق 295 جنيه، وكمجموعة مقبلات متنوعة، التجربة كانت لطيفة وتستحق الاهتمام.
هل يستحق STARTERS التجربة؟
أكتر حاجة عجبتنا في STARTERS هي جودة الطعم والإحساس البيتي اللي ظهر بوضوح في الأطباق اللي جربناها. كمان تنوع المقبلات الشامية بيديك فرصة تختار أكتر من حاجة بدل ما تكتفي بطبق واحد.
الملاحظة الوحيدة عندنا تخص مساحة المكان؛ كان ممكن يكون أكبر شوية ويوفر تجربة جلوس مريحة أكتر، لكن واضح إن الفكرة الأساسية للمشروع معتمدة على الدليفري والتيك أواي، وده بيخلي المساحة الصغيرة مفهومة في سياق طبيعة المكان.
في النهاية، لو بتحب المقبلات الشامية وخصوصا فتة ورق العنب والتبولة، STARTERS تجربة تستحق إنك تحطها في حساباتك لو كنت في المعادي.
العنوان: شارع 202، دجلة، المعادي.
مقترح
فن وثقافة
كايروكوميكس 2026: 3 أيام من القصص المصورة والفن والدخول مجانًا
أنشطة مجانية فعاليات القاهرة +6
معالم وسياحة
