The Definitive Guide to Living in the Capital , Cairo , Egypt

مطاعم كتير في القاهرة بتقدم مشويات، لكن من النادر تلاقوا مكان بيعمل الأكل بشكل محترف من حيث التسوية والتظبيط مع خدمة كويسة، وآه لو المكان الفيو بتاعه مميز، وعنده أطباق مبهرة، يبقى كدة جبرت! والحقيقة إن ده اللي لقيناه في مطعم Lamb Chef، وهو مطعم أصله سعودي وفتح أول فرع له على كورنيش النيل في المعادي.

تصميم المطعم كلاسيكي وهيفكرك بالمطاعم بتاعة زمان، بكراسيه الكبيرة وترابيزاته الخشب الزان.

المطعم بيقدم خدمة تسوية الخروف قدامكم على الفحم، واللي تقريبًا بنشوفها لأول مرة في مطاعم القاهرة.

أول ما عملنا الأوردر، نزلت لنا شوربة عظيمة وطعمها حكاية ودي بتنزل مع كل الطلبات. طلبنا مفلفل لحم وهو عبارة عن قطع لحم مع الصلصة المميزة والفلفل الحار والبصل الخفيف، وسعره كان 96 جنيه، وطعمه كان وهم بالمعني الحرفي، وبقينا ناكله بالمعلقة من حلاوته.

كمان طلبنا طبق رئيسي كباب فراخ، ولكن للأسف نزل لنا فراخ مشوية ولما اتكلمنا مع الموظف إننا طلبنا كباب فراخ، قال لنا إنه مش موجود عندهم أصلًا رغم أنهم كاتبينه في المنيو كطبق رئيسي!

اضطرينا ناكل الفراخ المشوية اللي كان سعرها 98 جنيه، والجميل إنها كانت عظيمة، وطعمها خلانا ننبسط وننسى مشكلة عدم وجود كباب الفراخ، كانت متبلة حلو ومش حراقة وطعمها كان ممتاز.

كمان طلبنا منهم ريش مشوية علشان نجرب لحمته، وكان سعرها 205 جنيه، ورغم أن طعمها كان حلو لكن الكمية كانت قليلة وطريقة التقديم مش أحسن حاجة، وده خلانا مانستمتعش بالطبق.

تجربتنا في المجمل كانت معقولة، ونتمنى المرة الجاية يكون المكان أقوى ويقدم لنا أطباق أحلى وأحلى.

وتقدروا تعرفوا أكتر عنهم بزيارة صفحة الفيسبوك من هنا.