The Definitive Guide to Living in the Capital , Cairo , Egypt

المطربة المغربية جنات أطلقت ألبومها الرابع بنفس الكلام بعد 3 سنين غياب، وفي نفس الوقت جنات بتغني أغنية فيلم اللي اختشوا ماتوا اللي بيتعرض في السينما حاليًا. تعالوا نشوف إيه الفرق بين الألبوم الجديد والألبوم اللي فات.

أغنية عايزة أقرب عادية جدًا. بس الغريب أن صناع الألبوم اختاروها علشان تبقى أول أغنية في الألبوم. يمكن اختاروها لمجرد أنها أغنية إيقاعية بس. الموزع أحمد وجيه ما عملش أي مجهود في الأغنية. والملحن الموهوب تامر علي كان أقل من مستواه.

في محاولات جنات أنها تخرج من الأغاني الهادية بتحاول تكتشف نفسها في أكتر من شكل موسيقي. أغنية أخدت قرار هي أغنية إفّيه. فيها أكبر قدر ممكن من كلام الحوار العادي أو مفردات الشارع. هنلاقي الشاعر هاني أبو اليزيد كاتب حاجات زي (عمال بتسيطر سنّة سنّة .. صحصحت مشاعر النايمة ننة!) وللمرة التانية بنشوف استسهال غير عادي في التوزيع من الموزع يحيي يوسف. مافيش أي محاولات عشان يضيف أي جديد للألحان.

الملحن المتميز مصطفى عوض بيرجع تاني بعد فترة غياب طويلة جدًا في أغنية مش رجولة. واختار المنطقة الأجمل في صوت جنات. واستغل حنيّة مقام النهاوند علشان ينسج جملة لحنية عاطفية وسلسة. القانون والأكورديون الفرنساوي في الخلفية أضافت ثراء للأغنية. ودي حاجة تحسب للموزع أسامة عبد الهادي. جملة الفاصل على بساطتها لكنها معبرة وفيها شجن.

لحن أغنية 100 دليل قرب جدًا من أغاني وردة في التسعينيات. جملة لحنية خفيفة لكن فيها مساحة للطرب. وكالعادة التوزيع عادي، وجملة الفاصل وخلفية الكامنجات بسيطة جدًا.

أغنية بنفس الكلام تستحق تكون أهم أغنية في الألبوم. الملحن القدير خالد عز نسج لحن رائع بتتابعات نغمية جديدة ومختلفة. الأغنية بتعبر عن حالة الملل أو الفتور بين الحبيبين. بداية من الكوبليه التاني الإيقاع بيختفي تمامًا وبتقول الكمنجات سلالم نازلة وده تجسيدًا لحالة الملل.

المقدمة الموسيقية لأغنية أكيد زعلت تحسب للملحن تامر علي. الكلمات بتعبر بحرفية عن حالة الندم والصدمة، بعد ما تخلت جنات عن حبيبها بإرادتها. هنا كلمات الشاعر تامر حسين هي بطلة الأغنية. جمالية اللحن بتظهر عند (مع أنها ممكن تكون روحه وحبيبته)

في أغنية آخر أحزاني الشاعر أحمد علي موسى بيقدم لنا جمل جديدة وغنية زي (ربنا مايجيبش جروح تاني .. ويخليك آخر أحزاني) والرغبة في التشفي والانتقام واضحة على طول الخط. لحن محمد عبد المنعم أغرى جنات إنها تغني عكس لونها تمامًا. الجملة الشعبية البسيطة، اللي فيها مساحات واسعة كان ممكن جنات تغنيها أحسن من كده. اللحن والتوزيع كانوا بين البياتي والكرد. والمقسوم العالي في الخلفية أكد على الروح الشعبية للحن.

في أغنية اسأل مجرب حاول محمدي أنه يقدم لحن مختلف، لكن كانت محاولة مش ناجحة أوي. وبرضه كلمات نادر عبد الله مش جديدة. ذروة اللحن عند (شوفوا اللي قاسوا واللي تعبوا قد إيه) الموزع ياسر ماجد رسم خط الوتريات في الخلفية عشان يبروز باقي العناصر، لكنها كانت مهمة صعبة، لكن يكفي شرف المحاولة.

(تملي اللي غلط يبقى كلامه كتير) جملة موفقة جدًا من أمير طعيمة في أغنية ماتتكلمش. لحن إيهاب عبد الواحد قرب كتير من أغنية ده كان لمحمد حماقي وخاصة في البداية. الكريشندو (تصاعد اللحن) قدر يوصل حالة الأغنية بالظبط. وكأنه حوار بين اتنين وشوية بشوية بتبدأ النرفزة والصوت العالي.

أغنية بطل تغني هي محاولة جديدة علشان جنات تخرج من لونها اللي الناس اتعودت عليها فيه. وتقول أنها تقدر تأدي كل الأشكال الموسيقية. كلمات ملاك عادل مختلفة إلى حد كبير عن باقي الأغاني هنلاقي حاجة زي (ده الشوق مافيهوش إتيكيت) ملاك قدر يبرز جانب البنت الشقية في شخصية جنات، في حاجة زي (أحمد ربنا إن أنا معجبة بيك أصلًا متمثلش) وإلى حد كبير قدر لحن محمد يحيي أنه يجسد نفس الحالة. بلحن حيوي سريع. وساب مساحة كبيرة لجنات عشان تستعرض المنطقة دي في صوتها.

في المجمل توزيع الألبوم بالذات كان أضعف جزء. ويمكن الألبوم اللي فات كان فيه تنوع في الأشكال الموسيقية أكتر. وكان فيه محاولات جريئة لدمج الموسيقى الشرقي بالغربي واهتمام بالتوزيع زي اغنية حب جامد مثلًا اللي اخدت من الكانتري ميوزيك تفاصيل حلوة كتير.