The Definitive Guide to Living in the Capital , Cairo , Egypt

خالد سليم من أهم المطربين في جيله. صوت قوي بمساحة واسعة وخامة متميزة. ألبومه الأول (عالم تاني) صدر عام 2000 وكان بداية قوية عرفت الناس بيه. قدّم أغاني كتير متميزة. (لكل عاشق وطن) من فيلم أبو علي. وأغاني فيلم سنة أولى نصب.

التمثيل أبعد خالد سليم عن الغناء أو على الأقل بقى مش مركز في المزيكا. ألبومه الأخير (ده أنا) صدر سنة 2010 وللأسف مخدش فرصته بسبب الأحداث العاصفة اللي مرت بيها المنطقة كلها.

وفي ألبوم “أستاذ الهوى” لسه خالد سليم بيجرب يغني أنماط موسيقية مختلفة. يبان من الظاهر إنه بيقدم أغاني متنوعة، لكنه في الحقيقة لسه في مرحلة ارتباك وبيدور على طريقه الصحيح. الألبوم ده تجربة جديدة ومختلفة، وخطوة في طريق خالد سليم علشان يقف على أول طريقه الخاص بعد 16 سنة من احتراف الغُنا.

الملحن الموهوب محمد رحيم قدم جمل لحن حيوي، يحمل لمسته الخاصة في أغنية سيد سيدي من مقام النهاوند. توزيع أمير محروس أضاف جمال وحيوية للأغنية بجُمل الأكورديون والباص جيتار في الخلفية.

[عديت على قلبى على سهوه
ياسيدى وسيد سيدى
وقعتلى فنجان القهوه اللى انا ماسكه فى ايدى]

بداية ممتازة لأغنية بنسى الهموم للموزع طارق حسيب كتمهيد للجو الرومانسي الهادي. جملة المقدمة والحوار المتبادل بين الوتريات والجيتار الاسباني والباص جيتار ممتاز. واستخدام البيركشن في زخرفة الخلفية فكرة ممتازة. كأنه إيقاع دقة القلب الملهوف. خط الوتريات على طول الأغنية مكتوب بروقان ومتنفذ بحرفية سواء في الخلفية أو في الفواصل. ولحن محمد الفخراني متشبع بالدفا والحنية والرقة اللي مقام النهاوند.

أول ما هنسمع الوتريات في مقدمة أغنية مش عايزك ترجع هنعرف إنها توزيع فهد. ونقدر نقول بكل صراحة إن الأغنية كانت هتخسر كتير لولا التوزيع القوي المتماسك.

فهد كالعادة أجاد استخدام الوتريات كلها. الخط الأول للتشيللوهات العريضة في الخلفية. والثاني للكمنجات اللي بتقول من أعلى نقطة، من غير ما تتقيد بالجملة اللحنية. عزف الكمنجات بطريقة البيتزيكاتو(عزف الكمنجات بنقر الأصابع) معمول بحرفية ودقة.

الموزع طارق توكل استخدم الأكورديون الفرنساوي والكمنجات في مقدمة أغنية انسان مرفوض كتمهيد لحالة الفراق والزعل بين حبيبين. لحن مدين جميل وبيوصل للذروة عند (أوقات باشتاقلها) وصوت خالد سليم واضح إنه مرهق جدا وبالذات في المناطق العالية.

كلمات أحمد فؤاد في أغنية ليالي سهران ركيكة جدا. وهنعرف مدى سوءها لو قرأناها لوحدها من غير مزيكا!. لحن عبودي الشرنوبي بيظهر ضعفه وخالد سليم بيقول (دي ليلة في بعده والله عذاب) في المرة الأولى تحديدا.

مدين مقدم لحن قوي في أغنية حبيت حياتي والموزع أحمد عبد السلام أجاد في إضافة جو مبهج بالجيتارات والبركشن وصوت الصقفة. وخط وتريات في جملة الفاصل ممتاز.

أغنية أستاذ الهوى من أجمل أغاني الألبوم. مشكلتها الوحيدة إن اللهجة كانت خليط بين الصعيدي والخليج. ويُحسب لصناع الأغنية كلهم إنهم فكروا في تقديم فكرة جديدة زي دي.

كلمات أحمد مرزوق متأثرة بفن الواو أو الشعر الشعبي في صعيد مصر. وكتبها بانسيابية وسلاسة تامة. وهنلاقي حاجات زي

[هتعيش المحبة في قلبي ولو حتى النفس يتقل بي]

[ياما قاللى بدلع بوس تانى
انا ورده ولقيت بستانى]

[أحبابي لا جم وشافوني، ولا كل الأطبة شفوني]

[احلف باللذي سواني. أنا جمر الغرام سواني]

جمل محمد رحيم اللحنية مشحونة بإحساس عالي. وبتيجي عند القمة في (لا أنا قد اللي عودها ده فاير) فهد العبقري استفاد من المزيكا الصعيدي واستخدم المزمار في جملة الفاصل الرائعة، وعملها من نفس نسيج اللحن.

نقر نقول إن أغنية الأمل الأخير من أفضل الأغاني في 2016 ده لو مكنتش الأفضل. وبذكاء خالد سليم خرج من دائرة الأغاني العاطفية الضيقة لبراح الأغنية الإنسانية.

[وقلبى بيتألم ع اللى مافيش حد يساعده 
عايش فى الدنيا لوحده كل الناس عنه بعيد
قلبى بيتألم ع اللى ظلمته ايامه 
وبسيطه ياناس احلامه
لكن مش طايله الايد ]

كلمات عزيز الشافعي رائعة ومابقيناش نشوف زيها كتير. وغريب فعلًا لما نشوف أغنية في ألبوم مطرب شاب بتتكلم عن حق الفقراء والغلابة في حياة جيدة. ومانقدرش نقول غير شكرًا لكل صناع الأغنية وأولهم خالد سليم على اختياره الرائع.

مسك الختام مع محمد رحيم كشاعر وملحن في أغنية يا واخد قلبي الأغنية مناسبة تمامًا لصوت خالد سليم العريض الواسع. رحيم بدأ اللحن من مقام الكرد وعند (راحت ليالي) ودخول الإيقاع بنروح لمقام النهاوند. وبيكتسب اللحن حيوية من إيقاع المقسوم ومن جمال وحيوية الجملة الموسيقية. وغالبا جملة الفاصل بالأكورديون صياغة محمد رحيم نفسه.