The Definitive Guide to Living in the Capital , Cairo , Egypt

صدور ألبوم عمرو دياب (أحلى وأحلى) هو الحدث اللي كلنا بنستناه. عايزين نشوف إيه الجديد اللي هيفاجئنا بيه بعد تجربة كبيرة عمرها أكتر من 30 سنة، وعايزين كمان نعرف الفرق بينه وبين الألبوم اللي قبله (شفت الأيام) من سنتين، خلونا نشوف عمرو دياب مقدم لنا إيه السنة دي.

رسمها

أغنية رسمها فرحتنا بعودة الملحن الموهوب عمرو طنطاوي اللي عمل لعمرو دياب أغاني كتير حلوة منها ويلوموني مثلًا ومن فترة اكتفى بأنه يبقى عازف الجيتار الرئيسي في فرقة عمرو دياب رغم إمكانياته العالية وفهمه لصوت وشخصية عمرو دياب. عمرو طنطاوي قدم لحن ديناميكي وحيوي. الموزع أسامة الهندي أضاف جملة موسيقية سريعة علشان تناسب اللحن. موسيقى الفاصل فكرتنا بموسيقى فيلم Ocean's Twelve وتحديدًا في مشهد Laser Dance. لكن في سؤال مهم للشاعر تامر حسين، اللي له نصيب الأسد في كلمات أغاني الألبوم، إيه المقصود بـ (رسمها داير ما يدور) تحديدًا؟

أحلى وأحلى

في أغنية أحلى وأحلى بنشوف نفس الثلاثي في الأغنية اللي فاتت، أغنية إيقاعية خفيفة، مناسبة تمامًا علشان تشتغل في الأفراح والمصايف.

معاك قلبي

في أغنية معاك قلبي بيتغير المود، وبنسمع أغنية  Slow. الإيقاع غايب طول الأغنية تقريبًا. ودي لمحة ذكية من الموزع أسامة الهندي. علشان غياب الإيقاع بيأكد على الهدوء السائد على طول الأغنية. الإيقاع هنا معتمد على حرفين بس في البيانو. ونغبشات الباص جيتار. دخول الجيتار الإليكتريك عند (معاك قلبي) علشان يعمل نوع من الحيوية.

أمنتك

المقدمة الموسيقية لأغنية أمنتك هيئتنا علشان نسمع أغنية فيها طابع طربي. لكن الموزع أسامة الهندي بيودينا في ناحية تانية خالص، وبيبدأ الغُنا من طبقة القرار، بجملة لحنية عادية. دخول المقسوم ما عملش أي تغيير في المود، الأغنية كانت تحتمل حيوية أكتر من كده، من ناحية التوزيع بالذات، صولو الكمنجة في نهاية الأغنية رائع.. والليالي اللي قالها عمرو في الآخر ممتازة.

لا لا

بنرجع تاني لأغاني الأفراح بأغنية لا لا، لما نسمعها هنسأل ليه اشترك في تلحينها عمرو دياب وعمرو طنطاوي؟ ليه 2 ملحنين؟ ولو حذفنا كلمة لا بتكرارها والفاصل الموسيقي – Latin pop – إيه اللي هيتبقى من الأغنية؟ وكالعادة كلمات تامر حسين فيها تركيب مش مفهوم، يعني إيه (شفت قلوب كتير عاشقين وماهمنيش؟).

عكس بعض

دخول البيانو في بداية أغنية عكس بعض كان قريب إلى حد ما من بداية أغنية Sorry seems to be the hardest word للمغني الإنجليزي Elton Jones لكن الموزع عادل حقي قدر يهرب بذكاء من التشابه التام وراح في ناحية تانية. بداية من (كنا دايمًا عكس بعض) بيتحول الهدوء اللي بدأت بيه الأغنية لعاصفة مع الجيتار الإليكتريك والدرامز، لحن إسلام زكي من أفضل ألحان الألبوم. والشاعر تامر حسين كان في أفضل حالاته، موسيقى الفاصل نقطة قوة تحسب لعادل حقي.

حبيبتي

الشاعر تامر حسين اتكلم عن الحبيبة من منظور حسي إلى حد كبير في أغنية حبيبتي. هنلاقيه بيقول (أنا ليا نظرة أعرف بيها.. الواحدة إيه أحلى ما فيها) و(حبيبتي لما بتتمايل خطوتها بتسوي هوايل) و(عودك طرح قبل أوانه)، لحن طارق نديم عادي، تآلفات الجيتارات عملها أسامة الهندي بحرفية وشياكة، لكن جملة الفاصل نفسها كانت عادية جدًا.

وعدتك

عودة مرة أخرى للجيتارات الأسباني في مقدمة أغنية وعدتك، وموسيقى الـ Latin Pop لحن إسلام زكي مافيهوش جديد، مجرد لازمة لحنية بتتكرر في الكوبليهات، والأغنية بشكل عام مافيهاش جديد، جملة الفاصل بالجيتارات عادية وسمعناها في أغاني لعمرو دياب قبل كده.

راجع

في أغنية راجع لحن إسلام زكي هو البطل -على عكس الأغنية اللي فاتت- لحن مميز رغم بساطته، كلمات تامر حسين موفقة جدًا في التعبير عن الفراق، وخاصة لما بيقول (يا خسارة بتيجي الحاجة لما الواحد مايعوزهاش) صوت عمرو دياب واضح أنه مجهد في الطبقات العالية وخاصة عند (مين استغنى وباع ببلاش) اختيار الموزع أسامة الهندي كان موفق لنبضات الباص جيتار، خط الكمنجات على طول الأغنية كان ناعم وسلس.

على حبك

أغنية على حبك من أفضل أغاني الألبوم. المقدمة والحوار بين الأكورديون الفرنساوي والكمان رائع جدًا ويحسب للملحن الموهوب سامح كريم، اللي عمل جملة لحنية جميلة وكلها إحساس. الكمان والأكورديون أضافوا ثراء وجمال بوجودهم طول الأغنية. أداء عمرو دياب جميل وهادئ، والشاعر أسامة مصطفى كتب جملة من أفضل الحاجات اللي اتقالت في أغنية لما قال (وطبعك خدت منه حاجات).

أنا وأنت

الأغاني اللي زي أغنية أنا وأنت نجاحها مضمون، ووجودها ضروري. الشاعر أحمد علي موسى بدأ بداية ممتازة لما قال (أنا وأنت اخترنا أننا نبعد عن بعض خلاص.. يبقى ملوش لازمة يبان ضعفي وضعفك قدام الناس) لكن للأسف باقي كلمات الأغنية عادية، ولحن أحمد البرازيلي عادي جدًا.

عمرنا ما هنرجع

في أغنية عمرنا ما هنرجع بنفتكر أجواء التسعينات من خلال مفردات المزيكا اللي المفروض أن الموسيقى في مصر تجاوزتها من فترة طويلة، والغريب في الأغنية أن كلمات تامر حسين حزينة بتجسد حالة الفراق. لكن اللحن والتوزيع فيهم حركة وحيوية على عكس الكلام، الموزع أسامة الهندي اللي كان له نصيب الأسد في توزيع أغاني الألبوم اتعامل مع الأغنية بمفردات أغاني التسعينات، من الإيقاع المقسوم والباص جيتار على طول الأغنية.