The Definitive Guide to Living in the Capital , Cairo , Egypt

ومين ما بيحبش السفر؟ متعة اكتشاف الذات والناس والأماكن، والهروب من الروتين والشغل والملل.. لما بنتعرف على تجارب ناس غيرنا في السفر ده بيكون مفيد لنا جدًا بيخلينا رايحين الأماكن وإحنا عندنا معلومات عنها وعارفين كل شبر فيها وده بيخلي السفر ممتع ومفيد وموفر.

في السطور الجاية هنعرض عليكم مجموعة كتب مهمة لازم تكون في مكتبة كل عشاق السفر.

يا مسافر وحدك

هنبدأ بكتاب مكتوب بأسلوب رشيق، وهو “يا مسافر وحدك” وده كتاب من أدب الرحلات والسفر، صدر عن دار الكتاب، وبيوثق لرحلة الكاتبة إيمان الأمير لباريس. يا مسافر وحدك مكتوب بإسلوب بسيط وتلقائي، هتحس أن الكاتبة قاعدة معاك على كافيه وبتدردش عن تجربتها، وهتلاقي فيه معلومات حلوة ونصائح للتعرف في وقت قصير على باريس وزيارة أهم الأماكن فيها.. الكاتبة بتحكي عن كل اللي قابلته في باريس.

الفيروزية

الكتاب الثاني هو الفيروزية للكاتبة شيرين عادل والصادر عن دار نهضة مصر، وهو تجربة حقيقية لرحلة قامت بها شيرين لسوريا والأردن ولبنان، شيرين بتحكي بالتفصيل عن رحلتها المميزة، والخلفية دائمًا هو صوت فيروز الجميل اللي أغانيها كانت مسيطرة، وعلشان كدة الكتاب اسمه الفيروزية، مشكلة الكتاب الوحيدة أن الكاتبة بتحكي فيه عن سوريا قبل الربيع العربي وخراب سوريا، ويمكن ده توثيق رائع لسوريا قبل الحرب والدمار، أسلوب شيرين مميز جدًا والكتاب فعلًا يستحق القراءة.

سافر                                    

الكتاب الثالث مهم جدًا لكل الناس اللي نفسها تسافر أوروبا وهو كتاب إلكتروني اسمه “سافر” وبيجاوب على سؤال مهم: كيف تسافر إلى أوروبا لمدة 15 يوم بـتكلفة مالية قليلة، الكتاب فيه تفاصيل مفيدة عن السفر لسويسرا وفرنسا وأسبانيا، الكتاب من إعداد وليد عوض وبيقول في مقدمة الكتاب: “كل الناس بتتكلم عن موضوع السفر و أنه صعب ومكلّف ولازم تكون مليونير علشان تسافر ولازم تكون بتتكلم 3 أو 4 لغات و و و ، وبما أن المصري مافيش حاجة صعبة عليه وطول عمره معروف بقوته وجبروته وبيفوت في الحديد أنا هشرح كل التفاصيل اللي تتعلق بالسفر”. الكتاب متاح على الإنترنت.

حول العالم في 200 يوم

رغم أنه مش كتاب جديد لكن يظل كتاب حول العالم في 200 يوم واحد من أهم الكتب العربية اللي لازم تكون في مكتبة عشاق السفر، الكتاب من تأليف أنيس منصور، وبيوثق فيه رحلته حول العالم اللي استمرت 200 يوم، الكتاب حقق مبيعات كبيرة جدًا وطبع منه عشرات الطبعات وفي الطبعة الثالثة منه كتب المقدمة طه حسين وقال فيها: “هذا كتاب ممتع حقًا: تقرؤه، فلا تنقص متعتك، بل تزيد كلما تقدمت في قراءته”.

رحلاتي في مشارق الأرض ومغاربها        

كتابنا الأخير هو واحد من أهم كتب الرحلات في العالم العربي كله، الكتاب من تأليف الرحالة الشهير “محمد ثابت” وهو واحد من عشاق السفر، وأسلوبه الأدبي رائع جدًا، الكتاب عبارة عن توثيق لرحلة طويلة قام بيها الكاتب بتبدأ بدول زي السويد، النرويج، إنجلترا، أيرلندا، رومانيا، وتركيا. وبعدها بيسافر سوريا ولبنان وفلسطين. وبلاد المغرب العربي، والسعودية والعراق وإيران وأفغانستان، وبعدين بيدخل على أفريقيا وبيسافر أثيوبيا وكينيا وممبايا، وبعدهم الهند واليابان، ومنهم على أمريكا الجنوبية، وبيختم رحلته بأمريكا الشمالية وشوية جزر في المحيط الهادي.

خلصت كتبنا، لكن السفر والتجارب عمرهم ما بيخلصوا، سافروا واستمتعوا بالحياة.