The Definitive Guide to Living in the Capital , Cairo , Egypt

موسوعة مختصرة، بـ تحكى لك واحدة واحدة تاريخ العلم عند
الغرب وحياة العلماء، طول فترة الخمسة قرون اللى فاتوا، بين التقليد والتجديد،
صراع العلماء، حياتهم، شخصياتهم، عوالم جديدة عن العلم بشكل بسيط، ملحمة العلم
وانتصار العقل هـ تلاقيها فى الكتاب ده، سلسلة من حلقات التاريخ اللى محتاجين
نعرفه.

بعد مقدمة المترجم ومنهجه فى عرض الكتاب بـ تستمتع
ببداية العلم من وجهة نظر كاتبه فى العصر الحديث، هـ تلاقى كلام عن رجال عصر
النهضة واللى بـ يبدأوا بالعالم الجليل “كوبرنيكس” واللى كان شغله فكرة
عمل الكون وإزاى يتحرك الكون بالانتظام ده، وده تقريبًا كان فى القرن الـ15،
الجميل أن الكاتب فعلًا بـ يحكى ببساطة شديدة عن كوبرنيكس وكأنه بـ يقرأ أفكاره،
وبـ يتكلم على لسانه وعن طريقة معايشته لفكرته، عن اكتشاف الأمريكتين هـ تلاقى
حكايات عن أشخاص كثير أول مرة تسمع بهم، عن أفكار جلدت أصحابها وسجنتهم بل وقتلتهم
كمان، لأنهم خالفوا أوامر الكنيسة بأفكارهم فى الوقت ده.

بعد الفصل الأول بـ تجرى بك فصول الكتاب فى حياة العالم
والعلم وهى بالترتيب “آخر الألغاز، العلماء الأوائل، العلم يقف على قدمين،
الثورة النيوتنية، العلم المستنير أ. طفرة الكيمياء، العلم المستنير ب. التقدم على
جميع الجبهات”.

بالطبع بـ ينحاز المؤلف لعلماء بعينهم وهو بـ يحكى لنا
عن تاريخ العلم زى غاليليو غالليلى اللى بـ يقول عليه أنه الشخص الأحق بلقب “العالم
الأول” وده من وجهة نظر المؤلف راجع لأن غاليليو كان عنده منهج واضح بـ يطبقه،
وكان فاهم اللى بـ يعمله جدًا، وهو اللى عمل القوانين الرئيسية فى العلم والتزم بها
كمان.

الكتاب كمان بـ يجيب استشهادات من أقوال العلماء واللى بـ
تكون مفيدة جدًا للقارئ، لأنها مش استشهادات علمية بس لكنها كمان فيها معرفة
وفلسفة وأحيانًا كلام عن مضمون العلم أو عن فكرة يؤمن بها واحد من العلماء، زى
كلمة يوهانس كيبلر “هدفى أن أبين أن ماكينة الكون ليست مثل كائن يحيا ويتحرك
بقوة غيبية، بل أنها مثل الساعة”.

الكتاب بـ يتحرك فى مناطق كثير لكنه بـ يهمل بشكل واضح
العلماء العرب يمكن لأن الكاتب قرر يكتب عن تاريخ العلم فى الغرب، لكن من المفترض أنك
تعرضت للتاريخ يبقى تتعامل مع التاريخ باعتباره كل كامل الأجزاء غير مرتبط بمكان
محدد، طالما ربطت التاريخ بالعلم، وقررت أنك تكلمنا عن تاريخ العلم، فكان من
المفترض يكون فيه حضور للعلماء العرب اللى كان لهم تأثير على الغرب فى وقت من
الأوقات، لكن ده طبعًا عادى جدًا ومشاع فى أوربا وأمريكا اللى لسه لحد دلوقتى بـ يجيبوا
العرب فى أغلب أفلامهم عايشين فى صحراء وبـ يركبوا الجمل.

الكتاب فى المجمل ممتع وهادف وشيق، وبـ يعطي لك حصيلة
معلومات من الصعب أنك تلاقيها فى كتاب واحد زى الكتاب ده.