The Definitive Guide to Living in the Capital , Cairo , Egypt

رغم إن «مونچيني» بـ يوصل الحلويات
لغاية البيت، لكن للأسف طعمه مش بـ يوصل بنفس الكفاءة.

فرع «مونچيني» بتاع الزمالك موجود في
شارع إسماعيل محمد، في أبراج جده على الشارع. رغم إنه يا دوب كام خطوة من عند «ريجوليتو
– Rigoletto»، و «ماندرين قويدر» و«الصمدي»، بس موقع المحل المستخبي مش بـ
تخلينا نشوف المحل بسهولة. والحلويات الي بـ تفضل محطوطة في المحل فترة طويلة
لغاية ما حد يشتريها بـ تثبت كده.

«مونچيني» عنده تشكيلة إختيارات واسعة من
المنتجات وبأسعار معقولة جداً مقارنةً بالمنافسين اللي في نفس المجال. سواء الحلويات
الشرقية، الشيكولاتة، الآيس كريم، التورتات، البسكويت والعيش، كلهم كويسين جداً.
ده كمان عنده خط إنتاج للحلويات والكيكات المعبأة. لمّا رُحنا كُنا متوقعين حاجة
أحسن من الكيكات اللي بـ نجيبها من الأكشاك اللي في كل حتة، بس إكتشفنا العكس لمّا
جربنا الپاوند كيك بالڨانيليا في «مونچيني» (1.25 جنيه)، الكيكة طلعت لونها أصفر
والڨانيليا اللي فيها عبارة عن نكهة صناعية وكانت خفيفة وهشة، لكن مش هو ده بس
اللي المفروض يبقى في أي پاوند كيك.

الكرواسون أسعاره كويسة جداً، بـ تبتدي
من 3 جنيه للكرواسون السادة، أما المحشي فيه نوعين من الجبنة، جبنة بيضة (3.5
جنيه) وجبنة جودة (4.5 جنيه). وطبعاً ماتنتظرش منه على السعر ده إنه يبقى خطير.
وكمية الجبنة القليلة اللي في الكرواسون بـ تخليه خارج المنافسة جداً.

كيلو الپيتي فور بـ 60 جنيه ومش فظيع،
يعني السادة ماكانش له أي طعم، ونفس الحكاية بالنسبة لصوابع جوزالهند اللي عليها شيكولاتة
ومكسرات. فيه نوع واحد بس كان كان طعمه جميل، وكان متغطي بالشيكولاتة وعليه كمان شيكولاتة
فارماسي، لكن البسكوتة نفسها كانت ناشفة.

ممكن التورتات عندهم تبقى أحسن، يعني
تورتة الآيس كريم (72 جنيه) ومتزينة من فوق بقطع شيكولاتة. بس بعد تجربتنا لـ«مونچيني»
شعرنا أن منتجاته لا تُقارن بمنتجات المنافسين في نفس المجال.