The Definitive Guide to Living in the Capital , Cairo , Egypt

المكان فتح من حوالي 3 أسابيع،
وجذب عدد كبير من شباب المعادي أنهم يبقوا زبائن عنده في المدة القصيرة دي. موجود
في مكان مميز في شارع 9 بين «فيلا 55» و«بوتري كافيه» الجديد، والمكان يعتبر اكتشاف جيد لهواة القهوة والشيشة
وإضافة حقيقية للمحلات اللي مالية شوارع المعادي.

«مج شوت كافيه» بـ يقدم كل الحاجات الأساسية المهمة لأي
كافيه، ومذاقات متنوعة من الشيشة (أسعارها من 8 جنيه لـ 18 جنيه) وده على حسب
النوع والمذاق. فيه عصائر فريش وكوكتيلات وفخفخينا، ولو عاوز حاجة غير تقليدية جرب
عصير القصب (10 جنيه).

رغم
وجود محلات زي «بينوس» و«كوفي بين» و«جريكو» و«سيلانترو» في نفس الشارع، إلا أن «مج
شوت» أصبح له زبائن خاصة به بـ يحبوا الفرابية بالكريمة هناك ومخلصين لها علشان بـ
تتعمل بطريقة مبتكرة ومذاقات فريدة زي زبدة الفول السوداني والقرفة (25 جنيه). وإحنا
جربنا مذاق الكراميل الكلاسيك وما كانش وحش. المشروب بـ يكون عليه كمية كبيرة من
حبيبات الشوكولاتة على الوش، طعمه هـ يعجبكم قوي.

صحيح كلمة “لاونج” موجودة في اسم المكان لكن
في النهاية هو مجرد كافيه كاجوال عادي، وغالبًا بـ يجذب الشباب من أعمار صغيرة.
ولو كنت غاوي كورة وماتشات المكان هـ يبقى مثالي بالنسبة لك علشان فيه شاشة عرض
وبروجكتور وبـ يتم عرض المباريات المهمة كلها عليها، بس لازم تحجز قبل ما تروح.

المأكولات
بسيطة ومافيهاش اختراعات، والمقبلات لذيذة وبالذات صوص الجبنة والطماطم (12 جنيه)
وسمبوسك اللحمة (25 جنيه) ولو حد عاوز وجبات كاملة مش مجرد تصبيرة المكان بـ يقدم
طواجن زي البامية باللحمة (35 جنيه) وأطباق ثانية زي فيليه اللحم البقري (65 جنيه)
والشيش طاووق (35 جنيه).

نقطة ضعف
المكان الحقيقية هي أنه قريب جدًا –تقريبًا لازق– في محطة مترو أنفاق المعادي، وده
معناه دوشة جامدة جدًا في بعض الأحيان. بس بسرعة هـ تأخذ على رجرجة المكان بسبب سرعة
المترو، وبعد مرتين ثلاثة هـ تلاقي نفسك مش حاسس بموضوع المترو والهزة ده خالص.
غير كده المكان مريح ومثالي لمشاهدة المباريات أو خروجة دردشة حلوة مع أصحابك.