The Definitive Guide to Living in the Capital , Cairo , Egypt

نادر لما تلاقي مكان بيجمع بين الفيو المميز، والخدمة المعقولة، والبساطة، والمشروبات والأكل الحلو، وده اللي نجح فيه لابوار التحرير، اللي بيتميز بفيو مميز لميدان التحرير والمتحف المصري، وكمان خدمة جميلة لكل العملاء، وفي السطور اللي جاية هنقولكم على تجربتنا في لابوار التحرير بالتفصيل.

بعد ما وصلنا ودخلنا، قعدنا في أول ترابيزة فاضية تحت، وتقريبًا كانت الوحيدة لأن المكان زحمة جدًا، وأخدنا وقت علشان نطلب مشروبنا الأول اللي كان عبارة عن قهوة تركي سنجل بـ27 جنيه، وفعلًا بيستخدموا بن ممتاز، وكانت مستوية صح، وده خلانا ننسى الوقت الطويل في انتظار الموظف لحد ما جالنا وخد الطلب بسبب الزحمة.

بعد شوية المكان بقى أهدأ، فقررنا ننقل قعدتنا من تحت ونطلع الدور اللي فوق، اللي كان شبه فاضي تمامًا، وبردوا قعدنا شوية لحد ما قررنا ننده على الموظف علشان ياخد الطلب مننا، وقلنا نجرب أكلهم بقى، وطلبنا بيتزا تشيكن باربكيو بـ95 جنيه، وكانت العجينة خفيفة ومستوية وطرية في النص ومقرمشة من الأطراف، وكان فيها فراخ مشوية، وخرشوف ومشروم، وصوص باربكيو وجبنة موتزاريلا، وشرائح الفراخ كانت كميتها كويسة، ولكن يعيبها إنها كانت متغرقة صوص باربكيو زيادة عن اللزوم، فلو طلبتوها أكدوا على الموظف إن الصوص مايكونش كتير قوي، وماتنسوش إن حجمها كبير وعاوزة أكيلة.

كمان طلبنا منهم تشيز فرايز، بـ40 جنيه، ودي كانت عبارة عن بطاطس مقلية مع جبنة شيدر وبيف بيكون، وكانت عادية جدًا، ومتستاهلش الفلوس اللي ادفعت فيها خاصة إن مافيش حاجة مميزة فيها إلا التتبيلة الجاهزة، وكمان الكمية كانت قليلة جدًا بالنسبة للسعر.

خلصنا أكل وقررنا نطلب عصير جوافة فريش بـ30 جنيه، وده كان عصير طبيعي ومافيهوش ولا بذرة الحمد لله، ودي من النوادر طبعًا.

التجربة بشكل عام مريحة ومميزة، خاصة لو قعدتوا في الدور اللي فوق علشان تشوفوا فيو ميدان التحرير كامل مع المتحف المصري، أو قعدتوا تحت واللي هتشوفوا الناس والشارع والزحمة، وإحنا بننصحكم أنكم تروحوا الصبح بدري تفطروا هناك أو بالليل واستمتعوا بليل القاهرة الجميل.