The Definitive Guide to Living in the Capital , Cairo , Egypt

كنا بندور على حاجة جديدة في القاهرة، وبالصدفة وقع قدامنا كافيه اسمه “سبرتاية” وشعاره (اصنع قهوتك بنفسك). قررنا نروح المكان ونجرب الموضوع بنفسنا، علشان ننقل لكم التجربة كاملة.

المكان في شارع الحسين في الدقي، موازي لمحيي الدين أبو العز. لما توصل هناك هتعرفه من اختلاف الواجهة، اللي تحسها أرابيسك في نفسها كده. وأول ما تدخل هتحس ببراح في المساحة، رغم إن المكان صغير وضيق. ده غير هدوء المكان وجمال ديكوراته.

المكان كله كنب، قعدنا في ركن بعيد ناحية الكاشير والمطبخ، وطلبنا القهوة. بعد 5 دقايق جات لنا صينية فيها (سبرتاية – كنكة – فنجان سكر – فنجان بن). كلهم مصنوعين من الزجاج، وشكلهم مميز. الموظف أكد علينا إن الكمية بتاعة البن تكفي فنجان واحد، وكمان ماكنش فيه مياه عادية. واعتمدوا على زجاجة المياه المعدنية اللي نزلت أول ما وصلنا.

بدأنا نخوض التجربة ونعمل قهوتنا بإيدينا، وكنا مبسوطين إننا بنعمل ده. بدأنا نصنع قهوتنا، واستنينا لحد ما جهزت. شربناها وكانت مميزة وجميلة جدًا. وده لجودة البن اللي عملناها منه، وكمان علشان نار السبرتاية الهادية. وطبعًا الأهم لأننا متخصصين قهوة وبنعملها بمزاج. ولازم الصبر عليها علشان تقدر تشرب مشروبك المميز وتستمتع به.

المكان فيه مشروبات كتير، كمان بيقدم أكل، سواء سندوتشات أو مكرونات ووجبات. وعندهم  تقريبًا 6 أنواع حلو في المنيو، اللي كل واحد فيهم منفصل عن التاني.

الحقيقة كان فيه حاجة غريبة وقت الحساب، إننا كنا شفنا في المنيو إن القهوة بـ 25 جنيه، ولكن لما جالنا الحساب، اكتشفنا إن ثمنها بعد الضريبة 35 جنيه. ده طبعًا بخلاف المياه المعدنية والخدمة والضريبة المضافة. بكده يكزن الفنجان الواحد ثمنه أكثر من 50 جنيه، وده سعر غالي شوية على القهوة.