The Definitive Guide to Living in the Capital , Cairo , Egypt

بما أن سنة 2015 خلاص بـ تودع، كعادتنا كل سنة قررنا نكتب لكم عن أفضل الكافيهات اللي زرناها السنة دي:

بريوش دوريه – Brioche Dorée:

الكافيه مشهور بمخبوزاته وحلوياته الفرنسية، ده غير أن عنده مجموعة كبيرة من الأطباق الرئيسية واختيارات الإفطار؛ يعني في أي وقت هـ تروح هـ تلاقي حاجة مناسبة تاكلها، ده بجانب مجموعة المشروبات السخنة أو العصائر الفريش، بريوش دوريه كمان من الأماكن اللي الخدمة فيها مميزة وودودة.

منتشر في مولات مصر كلها، ولو مالكش في جو المولات جرب تروح فرع فندق الهيلتون في الزمالك.

أمير تيفولي –  Amir’s Tivoli:

اللي بـ يميز الكافيه ده عن غيره هو أنه Family Business، يعني كل فرد من عائلة د. أمير -صاحب المكان اللي عاش في هولندا لفترة كبيرة قبل ما يرجع لمصر- بـ يشارك بضمير في الكافيه، وبالتالي المكان له دفء خاص مختلف عن أي سلسلة كافيهات ثانية الناس اللي بـ تشتغل فيها مجرد موظفين، د. أمير كمان عنده مكون سري لكل طبق أو مشروب بـ يقدمه، وبالتالي اللي أنت  هـ تجربه هناك مش هـ تذوقه في أي مكان ثاني.

مكتوب على صفحتهم على الفيسبوك دلوقت أنهم هـ ينقلوا المكان من وسط البلد ويفتحوا فى الزمالك قريب، ننصحك بأنك تروح هناك، وحاول تعرف لنا المكون السحري.

بوتري كافيه – Pottery Café:

من الكافيهات المشهورة جدًا، وخصوصًا فرع أبو الفدا في الزمالك، واللي تقريبًا مافيش حد ما راحوش على الأقل مرة، من فترة الكافيه قام بمجموعة من التجديدات اللي حسنت من مستواه بدرجة كبيرة، وسواء رايح تاكل أو تشرب شيشة، هـ تلاقي كل اللي أنت عاوزه وبجودة ممتازة، ومع كل التجديدات اللي حصلت، بوتري كافيه لسه محتفظ بأسعاره المعقولة اللي مش هـ تفضي لك محفظتك.

لو رايح معاك مجموعة كبيرة، ننصحك تحجز قبلها وخصوصًا لو ويك إند.

ديوكس – Dukes:

ديوكس من الأماكن اللي اشتهرت بحلوياتها، وخصوصًا الـ Dirt Cake اللي بقيت بصمة مميزة للمكان، ولكن اللي ناس كثير ما تعرفوش أن ديوكس مش بس بـ يقدم حلويات، ده كمان عنده مجموعة كبيرة من الأطباق والمخبوزات الحادقة، واللي ما تختلفش في جودتها عن حلوياته.

بفروع كثيرة منتشرة في أنحاء القاهرة، ديوكس مش بس هـ ينجدك بالحلو في عزومة، ده ممكن ينجدك لو بـ تدور على مكان تقعد فيه قعدة حلوة بأكل حلو.

زوكا – Zucca:

بالرغم من أننا دائمًا بـ نبقى متشككين في الكافيهات اللي فكرتها الأساسية قائمة على الشيشة بس، إلا أن زوكا أثبت أن لسه فيه أماكن بـ تهتم بجودة أي حاجة بـ تقدمها سواء أكل، أو مشروبات أو شيشة، من مميزات زوكا أنه واسع وتقدر تقعد فيه مجموعات كبيرة من غير ما تحس أن المكان هـ ينفجر بالناس، ده غير أن الشاشات موجودة في كل مكان في الكافيه وده في حد ذاته مفيد في حالة وجود ماتش مهم نفسك تتفرج عليه في لمة.

ريجوليتو –  Rigoletto:

من أهم اكتشافاتنا السنة دي ككافيه مش محل آيس كريم، بالرغم من جودة منتجاته اللي عمرها ما قلت، إلا أن فروعه كانت وصلت لحالة بائسة، وأصبحت عتيقة لدرجة أنه من النادر أنك تلاقي حد قاعد فيها، ولكن الفترة دي عدت، والتجديدات الإيجابية سواء في الديكورات والجو العام للفروع، وحتى اللوجو والـ Packaging فرقت تمامًا مع اسم ريجوليتو.

لو عديت على فرع الزمالك في يوم هادئ، جرب تطلب منهم "يفرشوا لك" ترابيزة في المنطقة الخارجية وخذ كوباية قهوة مع كيك شوكولاتة… هـ تستمتع.    

سيركل كيه – Circle K:

بالرغم من أننا ما نقدرش نقول عليه كافيه بالمعنى الحرفي لأنه في نهاية الأمر سوبر ماركت، إلا أن الكافيه الملحق بالمكان مناسب جدًا لقعدة سريعة تشرب فيها كوب قهوة، أو تاكل من مجموعة السناكس السريعة والساندويتشات.

جرب السموزي المميز الخاص بالمكان، وهو CK Frosted، واللي بـ تحضره بنفسك وموجود منه نوعين: الليمون والتفاح الأخضر.

نوتيلاريا إيجيبت – Nutellaria Egypt:

ده نقدر نعتبره الجنة الخاصة بكل عشاق النوتيلا؛ كل حاجة في نوتيلاريا إيجيبت بـ تحتفل بعظمة أشهر Chocolate Spread عرفها  التاريخ، بالرغم من أن المكان مش بـ يقدم أكلات حادقة، إلا أنه مكان مناسب جدًا لأي حد بـ يعشق النوتيلا، من أول الوافلز الفريش اللي رائحتها تجنن، وتارت البلح بالنوتيلا اللي مالهاش حل… زيارتنا لنوتيلاريا كانت مميزة جدًا لدرجة أن المكان كان لازم يدخل المقال ده.

ما تنساش تشتري من هناك ميدالية المفاتيح اللي على شكل علبة نوتيلا… أكثر حاجة عجبتنا فيها أن العلبة المصغرة دي فيها نوتيلا بجد.

ليتشي – Lychee:

من الأماكن اللي في وقت قليل قدرت تكون مكانة عند كل الناس اللي بـ تحاول تختار أكل صحي، بس لذيذ في نفس الوقت، مش بس بمجموعة العصائر الفريش المختلفة والغريبة عن محلات العصائر الثانية، ليتشي عنده مجموعة كبيرة من السلاطات والساندويتشات اللي ممكن تكون أنسب اختيار بعيد عن المأكولات السريعة اللي عبارة عن كتلة دهون خالية من أي فوائد.

دلوقت لو اشتريت منهم زجاجة عصير برتقال (1 لتر) ورجعت لهم الزجاجة، تأخذ اللتر الثاني بنصف الثمن.

لا فريز – La Fraise:

بما أننا جبنا سيرة الأكل الصحي والعصائر، كان لازم نجيب سيرة لا فريز في المعادي، لأنه من أكثر الأماكن اللي اتبسطنا فيها السنة دي، مش بس بـ يتميز بمجموعة كبيرة ومختلفة من السموزيز اللي بـ تجمع فواكة تحسها غريبة مع بعضها -زي مثلًا كيوي كراش اللي بـ يجمع بين البرتقال والكيوي- ده كمان بعد ما تختار العصير ويعمله بـ يخليك تذوقه في كوب صغير الأول، علشان تعدل فيه براحتك قبل ما تأخذه بشكل نهائي.