مين فينا ما بيحبش يفطر الصبح مع كوباية قهوة بالطريقة اللي بيحبها وحاجة مسكرة معاها، واللي على مر العصور زاد تعقيد كيفية عمل القهوة والحاجة المسكرة اللي جنبها، لدرجة إن بقى صعب نرجع نشربها في صورتها القديمة، ما بين سباق المحلات في النوع والطعم والشكل والسعر بقى موجود عالم جديد من الحلويات اللي مليانة سكر وألوان مبهرة، وبرغم ضرر ده على الصحة إلا إنه بقى إدمان من نوع خاص صعب مقاومته. ودانكن دونتس – Dunkin donuts بدأ في السباق ده من سنين طويلة، لكن نزل لنا مصر من فترة قصيرة بس.
خدنا أوفر إن أي كراميل ماكياتوه معاه دوناتس واحدة هدية، وطلبنا كراميل ماكايتوه ساقع وسط بـ 37 جنيه، ومعاه دوناتس بالبلو بيري، وكراميل ماكايتوه سخن صغير بـ 32 جنيه، ومعاه دوناتس زرقاء من فوق بطعم البلو بيري بس من فوق بس مافيش حشو جوه. وواحدة دوناتس Mr. Happy بـ 15 جنيه، وبروانيز كراميل بـ 20 جنيه.
الكراميل ماكياتوه الساقع كان حكاية ورواية، السكر مظبوط جدًا وطعمه منعش، لكن خلوا بالكم إن لو كلتم الدوناتس قبله مش هيكون له طعم، فأشربوه الأول وبعد كده حلو بالدوناتس، وبرضه الكراميل مكايتوه كان حلو جدًا ومظبوط. أما الدوناتس فالمدورة اللي بطعم البلو بيري، كانت حلوة لكن الحشو قليل من جوه، لكن العجينة كانت هشة وطازة، نفس الموضوع في Mr. Happy والبلو بيري التاني، العجينة هشة وطازة لكن محتاجة طعم أكتر. لكن البروانيز كانت مختلفة جدًا لأنها كانت نص كيكة براونيز عادية ونص طبقة تانية عبارة عن شوكولاتة بس، فكان طعمها حلو جدًا.
تجربتنا في المكان كانت مميزة، وأكيد هنجربها تاني قريب جدًا.
