The Definitive Guide to Living in the Capital , Cairo , Egypt

منطقة “داندي مول” أو
“كارفور” زي ما بـ يسميها ناس كثير ملجأ لأى حد حابب يخرج ويتبسط مع
عائلته أو أصحابه، وما أكثر الأماكن اللى ممكن تقعد فيها: مطاعم كثيرة زي «بيبلوس»
و«كازينو» و«سفاري» و«نوردسي»، وكمان «هارديز» اللى هـ تلاقى أمامه على طول مطعم «جراند
كافيه» اللى رحناه المرة دى.

القعدة هناك أغلبها كراسي خشب
وترابيزات مستواها منخفض عنها شوية، وكلها فى الهواء الطلق بـ يعلوها برجولا خشب
مفتوحة، فيه شاشات فى كل حتة ومراوح علشان الحر والمكان بـ يقدم شيشة. فيه مشكلتين
هـ تواجههم –خارج سيطرة المكان- متوقعين للأماكن المفتوحة وهما: الذباب والقطط.

المنيو كانت مغرية جدًا، الجرسونات
كانوا ودودين جدًا وخدومين، طلبنا فى البداية طبق مقبلات مشكل (34.99 جنيه) فيه 3
سمبوسك و2 كبيبة وورق عنب وسلاطات زبادي وحمص وطحينة وتبولة، شكلها كان حلو قوي
والأحلى منها أنها جاءت لنا فى صينية كبيرة مقسمة لكذا قسم وكل حتة فيها مقبلات
مختلفة، كانت فكرة حلوة. السلاطات كلها كانت فريش وحلوة قوي وفتحت نفسنا بس كان نفسنا
كمية الطحينة والحمص تزيد شوية.

أول ما بـ نطلب بـ ينزل لنا زجاجة
مياه صغيرة (5.50 جنيه)، فى الأطباق الرئيسية طلبنا بيكاتا بالمشروم (44.99 جنيه)
بـ ينزل معاها طلبين جانبيين اختارنا سوتيه وبطاطس محمرة، وكمان أخذنا ميكس جريل (56.50
جنيه) مع نفس الأطباق الجانبية، عاوزين نقول أن الأكل كله كان رائع وفيه حرفنة
داخل مطابخ جراند كافيه، اللحوم كلها كانت مستوية والخضار كمان كان فريش ومستوي
كويس، والبطاطس المحمرة كانت مقرمشة من بره وطرية من جوه فكانت امتياز، كان نفسنا
بس فى طبق البيكاتا أن المشروم ما يكونش كميته أكثر من اللحم.

الأكل كان كثير وفطسنا شوية، بعد
شوية راحة والاستمتاع بالجو والهواء طلبنا تحلية بانانا سبليت (19.99 جنيه)، بـ
تيجي فيها 3 أنواع آيس كريم فانيليا وشوكولاتة وفراولة وعليها صوص شوكولاتة
وشريحتين موز ومرشوش عليها مكسرات، كميتها كانت أقل من اللى بـ تقدم فى أماكن
ثانية بس الصراحة كده أحسن لأن الكمية الكبيرة بـ تكون بمثابة انتحار من كمية
السكر، المكسرات كانت خطيرة ومقرمشة كلها فريش والآيس كريم غنى وطعمه حلو.

بعد شوية ختمنا القعدة بأكسبريسو (9.99
جنيه)، وعصير ليمون بالنعناع (15.99 جنيه) رغم أنه ما كانش فى المنيو إحنا اللى
طلبناه، وعصير مانجو (15.99 جنيه) العصائر كلها فريش ومنعشة والأكسبريسو كان فى
الجون.

مكتوب فى المنيو أن فيه 10% ضريبة
مبيعات و12% خدمة لكن لما جاء لنا الحساب ما كانش فيه ضريبة، وكمان أعطوا لنا ورقة
علشان نقول رأينا فى الخدمة والأكل، كتبنا، وإحنا ماشيين لقينا الجرسون بـ ينادي
علينا عاوز يلحقنا علشان كنا كتبنا أن المكان مترب شوية لأنه غصب عنهم فى مكان
مفتوح والأكل اتأخر شوية، أكد لنا أنهم أول بأول بـ يراعوا نظافة المكان واعتذر
لنا عن تأخير الأكل، لكن أكدنا له أننا اتبسطنا وهـ نرجع ثاني، بس بجد حركة حلوة
منهم وصلت لنا معانى كثيرة ما حدش حريص عليها كثير دلوقت.. بجد اتبسطنا.