The Definitive Guide to Living in the Capital , Cairo , Egypt

في رأينا من أفضل الأماكن اللي
ممكن تروح تشتري منها إفطار صحي وطازج الصبح بدري وأنت مغمض، عمره ما خيب ظننا الحقيقة
وكل مرة بـ نستمتع بالخبيز الطازج والتشكيلة الكبيرة من العيش والحلويات
والمخبوزات والعصير الفريش من ساعة ما رجلينا زارت أول فرع لهم في الزمالك.

«تي بي إس – TBS» فتح فرع جديد أمام نادي الصيد في
الدقي، أكبر نوعًا ما من فرع الزمالك وبـ تطلع له بسلم رخام رمادي بترابزين زجاج
شيك جدًا وفيه جنينة صغيرة عند المدخل بحجر أبيض برضه شيك ورقيقة جدًا. أول ما بـ
تدخل هـ تلاقي نفس نظامهم ثلاجة العرض الزجاج فى الواجهة فيها الخضروات وأنواع
الجبن واللحوم وفى الخلفية أنواع عيش كثيرة أنت بـ تنتقي منها علشان تعمل
ساندويتشك بالمكونات اللي تختارها وده المبدأ اللي بدأه «تي بي إس» واتبعه أماكن
ثانية كثيرة.

فيه كمان بعد كده ثلاجة فيها
حلويات من تارت ودونتس (9 جنيه) ومخبوزات زي الكرواسون والباتيه المحشو والسادة
وعلى الجنب ثلاجة عصائر فريش سعر الواحدة منها (10.50 جنيه) وأول ما تدخل على
الشمال فيه استاند فيه رفوف عليها أنواع كب كيك ومافين وكوكيز سادة وبالشوكولاتة.

أسعار العيش اللي جربناها
البانيني البراون (10 جنيه) وده بـ يكون عليه حبوب شوفان وسمسم وأنواع ثانية مفيدة
فيها ألياف وده صحي جدًا، إضافة الروست بيف أو الفراخ المدخنة (15.50 جنيه
للواحد)، إضافة الجبنة (5 جنيه). فيه ضريبة 5% كاتبين أنها متضمنة في الأسعار.

فرع جديد وتوسع أكبر لسلسلة ناجحة
نتمنى أنها تستمر، ما ضايقناش بس غير أن الناس اللي هناك حسسونا أن بالهم مش طويل معانا
وإحنا بـ نسأل على الأنواع الموجودة والأسعار. بس ده ما يمنعش أننا بـ نحب “تي بي
إس”.