The Definitive Guide to Living in the Capital , Cairo , Egypt

بقلم وتصوير: رنا شرف

الجو في القاهرة بقى جميل، والربيع بيعوضنا عن برد الشتاء اللي طلع عنينا الشهور اللي فاتت! والعصائر والآيس كريم والأرز باللبن من الحاجات اللى كلنا بنحبها وبنطلبها في أي وقت، خاصةً في الصيف.

ومحلات العصير في العاصمة المصرية كتيرة جدًا، فيه منها المميز، وفيه منها العادي، وتجربتنا في محل القبيصي فرع المنيل تستحق نكتب لكم تفاصيلها في السطور الجاية.

القبيصى فريش له فروع كتير في القاهرة، وهو مش بس بيعمل عصائر عادية لأ، ده كمان بيعمل عصائر اختراع مع المكسرات زي اللوز والكاجو بالنكهات، زي الكاجو بالفانيليا كده، اللي جربناه ولقيناه حاجة وهمية، والشوب الصغير منه سعره 40 جنيه، والحقيقة كان حلو قوي، وكمان كمية الكاجو فيه كانت كتيرة، يعني فعلًا لو بتحب الكاجو هتنبسط جدًا بالمشروب ده.

جربنا كمان عصير الفراولة، اللي كان سعر اللتر منه 40 جنيه، وفعلًا عجبنا جدًا وحسينا إنه معمول بمزاج عالي جدًا.

اكتشفنا إن المحل فيه مان أرز بلبن، فقررنا نجربه، واختارنا طبق بنكهة الرافيلوا شوكولاتة المعروفة، وكانت بجوز الهند، والطبق مليان جوز هند وشوكولاتة وأرز بلبن، ومن الآخر كان اختراع بجد وسعره 40 جنيه.

آخر حاجة جربناها في المكان كانت فخفخينا سلطة فواكه عادية، ودي كان طاغي عليها عصير المانجا وسعرها 20 جنيه، وكانت جامدة جدًا بجد.

تجربتنا في القبيصي فريش كانت إيجابية، والمشروبات معمولة بحرفية عالية، والكمية حلوة، يعني باختصار المحل بينفذ منتجاته زي  ما الكتاب بيقول فعلًا.

إحنا روحنا الفرع الموجود في 51 شارع عبد العزيز آل سعود، المنيل، بجوار كوبري عباس، وأكيد هنجرب فروع تاني.

تقدروا تتعرفوا أكتر على المكان من خلال صفحتهم على الفيسبوك.