The Definitive Guide to Living in the Capital , Cairo , Egypt

لو هـ نتكلم عن الأكل داخل المولات، هـ تشوف ظاهرة غريبة مستمرة فى الانتشار وسط مشهد الأكل القاهرى المتغير دائمًا، ليه مطاعم كثيرة بـ تحاول تقدم تجربة أكل راقية فى مول تسوُّق كلُّه زحمة ودوشة؟ ده سر عمرنا ما هـ نفهمه! الأماكن الأكثر نجاحًا هى اللى بـ تقدم لك وجبة سريعة مش معقدة، وهو ده بالضبط اللى خطر على بالنا لما روحنا الدُكّان فى القاهرة الجديدة.

مكانه أمام نافورة كايرو فيستيفال سيتى الراقصة، وبـ يقدم فيها الدُكّان قعدة فى الخارج فقط، لكنها فعلاً مريحة ولطيفة. قابلنا الجرسون عند المدخل وعلى طول وصلّنا لأماكننا. المكان وقت زيارتنا كان مليان زبائن، لكن مش بشكل مزعج، والفضل يرجع لتقسيمة القعدات.

قدم لنا الجرسون المنيوهات، وبدأنا نتفرج على اختيارات معمولة على الطراز البلدى بشكل أنيق. من بين مجموعة متنوعة من أطباق الفول (9.50: 26 جنيه)، أطباق فلافل (8.50: 11 جنيه)، أنواع من البيض واختيارات لذيذة من الجبن، منها جبن حلّوم مشوى (35 جنيه)، الدُكّان بـ يقدم الأكلات التقليدية بأفكار مطرقعة. بالنسبة لأطباق مناسبة أكثر للوجبات الرئيسية، الدكان بـ يقدم مجموعة من الفطائر، المناقيش (37: 50 جنيه)، شاورما، كشرى (20 جنيه)، حواوشى (25 جنيه) مع أطباق مصرية ثانية.

عملنا الطلب، ووصلت مشروباتنا شاى أخضر (16 جنيه) وشاى عادى (13 جنيه) قبل الأكل. الأكل عمومًا وصل بعدهم بكام دقيقة وما قدرناش ننتظر علشان ندخل فى المُفيد. الثومية (20 جنيه) كانت كميتها كبيرة ومعاها سلّة عيش بلدى، وطعمها كان حلو لدرجة أنك بـ تأكلها على طول من الطبق بالشوكة، اللبنة بالزعتر (20 جنيه) كانت خفيفة، وغنية بالكريمة وطعمها لذيذ.

طبق الشاورما فراخ (54 جنيه) كان مُكوّن من عيش سورى رفيع مش ملفوف بـ يشكِّل طبقة تحت قطع الفراخ، وكان مطهى ومُتبَّل كويس، لكن الفكرة أنه وصل بارد شوية، ساندويتش الشاورما لحم (40 جنيه) كان برضه لذيذ، لكن فيه نفس مشكلة البرودة. أول ما قولنا للجرسون على المشكلة، اعتذر لنا فورًا وعرض علينا يسخن أطباقنا، وفعلاً فى ثوانى كان كله تمام وقدر ينقذ يومنا.

عموماً، الدُكّان مكان لطيف ومبهج للخروج، والفضل يرجع فى الأساس لمكانه عند النافورة الراقصة. الأكل لما وصل بارد فى البداية كانت حاجة محبطة، لكن الجرسون قدر ينقذ الموضوع وحل المشكلة. صحيح ناس كثير هـ تقول أن فكرة المطعم البلدى الأنيق اتهرست كثير، لكن فى الحقيقة أنها هـ تستمر، وعلى الأقل الدُكّان قدر ينفذها صح.