The Definitive Guide to Living in the Capital , Cairo , Egypt

زي الفول
والطعمية، الفطير حاجة أساسية في الأكل المصري خصوصا لو معدتنا فاضية والمحفظة
كمان فاضية، «الدوار » له 5 فروع في القاهرة والفطير بتاعه حلو وفريش وسعره مش
اكتر من 20 جنيه.

رغم ان عندهم
خدمة توصيل طلبات للمنازل سريعة بس إحنا فضلَّنا نروح هناك في فرع المعادي عشان
نختار الفطير اللي إحنا عايزينه ويكون فريش وسخن. المحل صغير والكاشير قدام الفرن،
والراجل اللي بـ يعمله شكله عجوز وشكل الشخصية الكارتون اللي على علبة
الفطير..صدفة؟

إضاءة الفلوروسنت
والترابيزات ماشجعتناش اننا نقعد وناكل في المطعم، الفطير كان بـ يتعمل بسرعة قدام
عنينا، والعاملين في المحل شاركونا في اختيارنا للفطير. بـ ننصحكوا بـ فطيرة
الكيري ميكس بـ 18جنيه وفطيرة الكيري العادية بـ 14.50 جنيه، فطيرة الكيري العادية
كانت المفضلة بالنسبة لنا لفترة طويلة بس الفطيرة الميكس بـ تيجي عليها فلفل أحمر
وأخضر وكمية كبيرة من جبنة كيري.

المنيو فيه إختيارات
متنوعة من الفطير المسكر والحادق بأحجام صغيرة ووسط وكبيرة. الفطيرة الصغيرة كافية
لشخص واحد، اما الناس اللي عندهم شهية كبيرة يجربوا الفطير الكبير بس ما ترجعوش
تقولوا ان إحنا ما قولنالكمش لما تلاقوا نفسكم مش قادرين تتنفسوا من كتر الأكل.

بس خد بالك،
على قد ما الفطير طازة هـ تحسه مدهنن وتقيل قوي، بس لذيذ!

لو بـ تحب
اللحمة، جرب فطيرة السجق الشرقي والبسطرمة بـ 10.50 جنيه، واللي بـ يحبوا الجبنة
لازم يجربوا فطيرة جبنة ميكس بـ 14.50 جنيه فيها الجبنة الموتزريلا سايحة مع
الجبنة الرومي والفلامنك.

الفطير
بالسكر واللبن كان رائع و بـ 4 جنيه. فطيرة سادة متغطية بـ سكر بودرة ونصف كوبية لبن
بـ يدي طعم مسكر ومحشية بالكاسترد وطعمها بـ يبقى خرافة. وتحذير؛ ماتاكلش الفطير
ده قدام حد انت بـ تحاول تثير إعجابه لإن صعب قوي انك تاكل الفطير من غير ما توقع
حاجات عليك وعلى الترابيزة والناس اللي جنبك. فطيرة النوتيلا بـ 11.50جنيه كانت مش
حلوة، الشيكولاتة كان طعمها مش زي النوتيلا خالص، إحنا عارفين طعم النوتيلا كويس.

«الدوار»
مناسب جداً لو يوم مكسلين تنزلوا وقاعدين في البيت مع أصحابكم. «الدوار» بـ يوصل
الطلبات بسرعة وده بـ يخلي الموضوع أسهل لو قررتوا تطلبوه في الشغل. سعره كويس بس
هو تقيل وتحس انك بعد ما اكلته عايز تروح تجري عشان تحرق سعرات بعد ما تفوق من غيبوبة
الفطير.