The Definitive Guide to Living in the Capital , Cairo , Egypt

بعيدًا عن أن أهم وجبة في حياة الإنسان هي الإفطار علشان الفوائد بتاعتها، خلينا نقول عن تجربة إن لو يومكم بدأ حلو هيبقى باقي يومكم لطيف في الأغلب. المرة دي قررنا نجرب Circle K اللي فتح مؤخرًا في دجلة المعادي، ودي كانت فرصة سعيدة لينا لأننا بدأنا يومنا بحاجة حلوة.

خلال السطور الجاية هنقول لكم على تجربتنا المميزة مع الإفطار في Circle K.

المكان لسه فاتح في دجلة المعادي، وهو قعدة خارجية مقسمة “بار وكراسي وترابيزات، وبرجولات”، وطبعًا في الداخل السوبر ماركت وطلبات التيك أواي، وكل الديكور من الخشب المودرن المميز والحقيقة الديكور وحده يكفي لجرعة انبساط مش قليلة، ورغم أن فريق العمل قليل والأكل اتأخر إلا أن اعتذار مسؤول المكان بنفسه مع موظف التقديم خلانا نتأكد المكان ده هيكون له شأن كبير في أقل وقت لأنهم بيهتموا بالعملاء بتوعهم، وماكتفوش بالاعتذار وبس ولكن قدموا لنا ميني باتيه وكوكيز هدية.

وقبل ما نقول رأينا في الإفطار خلينا نقول إننا كل يوم هنروح ناكل كوكيز من عندهم من جمالها وحلاوتها، والميني باتيه كمان كان مميز وحلو وخفيف والعجينة تستاهل 5 من 5، وماتنسوش أن المنيو عندهم إلكتروني وتقدروا تشوفوا المنيو من خلال سكان الباركود وتختاروا طلبكم بسهولة شديدة.

كان عندنا مشكلة أن مافيش كفر في بداية طلب الإفطار، ماكنش فيه شوكة ولا سكينة ولا معلقة نقدر من خلالها نقلب الأكل أو ناكل بيها مع العيش، وبدأنا طلبنا بطبق فول بزيت الزيتون بسعر 22 جنيه، وكان طعمه حلو وطازة ومافيهوش غلطة، بس لو أنتم بتتبعوا حمية ماتنسوش تقولولهم سواء مش عاوزين ملح أو تقدروا تطلبوا بزيت مختلف أو بدون زيت.

كمان طلبنا طبق بيض بالبسطرمة بسعر 44 جنيه، والحقيقة هو كان مالح شوية بس طعمه حلو وسعره أوفر شوية، والبيض بينزل متقطع مش قطعة واحدة وهو مش هيفرق ولكن لو حابين أنه يكون بطريقة خاصة بيكم تقدروا تطلبوا ده.

كمان طلبنا طبق جبنه بالطماطم مع زعتر وزيت زيتون وسعره كان 39 جنيه، وكان حلو جدًا وعجبنا، والكمية كانت كتيرة قوي، وبينزل مع الأكل عيش بحبة البركة رغم إنكم هتشوفوه تقيل ولكنه في الأكل كان خفيف وعجبنا، وفي المجمل الوجبة دي حتى لو كنتم أكيلة مش هتقدروا تخلصوها.

وطبعًا بما أننا في Circle K كان لازم نشرب حاجة، وقررنا نشرب كابتشينو علشان الكوكيز اللي كانت نازلة هدية اعتذار، وكان سعره 50 جنيه، وإحنا مش محتاجين نقول انه حلو ومعمول صح وكويس علشان هما مشهورين أنهم بيقدموا أفضل مشروبات وسط مجتمع الكافيهات ومراكز خدمة رجال الأعمال.

التجربة بشكل عام مميزة وانبسطنا والقعدة كانت مريحة بالنسبة لنا، وبنأكد أن المكان بيسعى يكون ذو شأن في دجلة خاصة أن الأماكن اللي مميزة بقعدتها والفيو بتاعها مش كتيرة في المنطقة، وبننصحكم بزيارته وتجربته علشان تبدأوا يومكم بحاجة حلوة، وأكيد في يوم تاني هنجرب الغداء أو العشاء عندهم وهنكتب عنه كمان.

وعلشان تعرفوا أكتر عنهم تقدروا تزوروا صفحتهم على فيسبوك من هنا.