The Definitive Guide to Living in the Capital , Cairo , Egypt

وجبة الإفطار هي أهم وجبة في اليوم، وده لأنها بتمنحنا الطاقة لبدء اليوم واستكماله بشكل صحي، علشان كده بنفرح قوي لما بنوصل لمكان بيقدم إفطار بجودة عالية وفي نفس الوقت قعدته مريحة وبتدي طاقة وبهجة، ومن الأماكن اللي نقدر نقول إنها بتقدم وجبة إفطار متكاملة (رالف جيرمان بيكري- Ralph’s German Bakery) واللي موجود في المعادي.

في الريفيو ده هنعرفكم أكتر على تفاصيل تجربتنا مع وجبة الإفطار عندهم.

لما تدخل المكان أول مرة هتلاحظ إن المكان صغير والمساحة الداخلية فيها ترابيزتين بس، لكن الإيجابي إن منطقة “الأوبن إيريا” أكبر شوية وفيها 10 ترابيزات، وده عدد كفاية بالنسبة للمكان وطبيعته.

فريق العمل مكون من مجموعة شباب لطيف، وإن كان ينقصه الخبرة في التعامل، ولكنهم بشوشين وبيسعوا لخدمتكم، لكن الحقيقة بيعيب المكان للأسف وجود “الذباب”، واللي ضايقنا عدد الكبير، هتلاحظوا كمان وفيه شجرة عاملة جو لطيف في المكان لكن كنا نتمنى يكون فيه اهتمام بتقليمها علشان يكون شكلها أجمل.

جربنا وجبة إفطار ألماني وسعرها 156 جنيه، وبتتكون من “عيش – جبنة شيدر – جبنة بري – رومي مدخن – سلامي – مربى – عسل – نوتيلا – زبدة”، والحقيقة كلهم كانوا حلوين ومميزين وخاصة الجبنة البري، وكمان كان معاهم أومليت معقول.

وكان مع وجبة الإفطار مشروب، فقررنا نختار لاتيه بدون أي فليفر، وكان مشروب لطيف الحقيقة ومعمول بمزاج وحب.

تجربتنا في المجمل كانت جميلة، وأكيد هنكررها تاني خاصة أنهم عندهم مخبوزات كتير مميزة محتاجين نجربها.

وعلشان تعرفوا أكتر عنهم تقدروا تزوروا صفحتهم على فيسبوك من هنا.