أنكل زاك – Uncle Zack.. وجبة إفطار مبهجة في التجمع
أماكن للإفطار في القاهرة أنكل زاك - Uncle Zack أنكل زالك فرع القاهرة عنوان أنكل زاك في القاهرة كافيهات منيو أنكل زاك التجمع
رنا شرف
إحنا في كايرو 360 بنحب الأماكن المصرية الخالصة، اللي بتحاول تقدم مستوى مميز من الخدمة مايفرقش عن الأماكن الأجنبية، علشان كدة انبسطنا جدًا بفرع أنكل زاك – Uncle Zack اللي فتح في التجمع، خصوصًا وأن المكان بدأ في المنصورة، وحقق نجاح خلاهم يقرروا يتواجدوا كمان في القاهرة.
تعالوا نتعرف أكثر على تفاصيل رحلتنا لـ أنكل زاك – Uncle Zack.
المكان مخصص لكل عشاق القهوة والأكلات الخفيفة اللي ماتحلاش غير مع القهوة، والمكان بيقدم إفطار مميز، وحلويات جميلة، وقهوة بأشكل مختلفة.
أول ما هتدخل أنكل زاك، هتلاقي قعدة خارجية في الهواء الطلق، وقعدة داخلية للي بيحبوا الأماكن المقفولة اللي فيها خصوصية.
ديكور المكان حلو ومريح، وكل حاجة في المكان عصرية، من أول الإضاءة ولحد الكراسي، والألوان المسيطرة على التفاصيل كلها هي الأبيض والأخضر.
القهوة في أنكل زاك متوفرة بأغلب أنواعها، من أول الآيس كوفي ولحد الأمريكان، وعندهم فعلًا مجموعة كبيرة من النكهات اللي بتميز المكان.
الحلويات كمان موجودة بعدد كبير من الأنواع والافتكسات، زي مثلًا الكرواسون المحشي نوتيلا وعليه صوص بستشيو، ولحد الدوناتس والآيس كريم بنكهاته المختلفة.
إحنا طلبنا إيه؟
كرواسون محشي كيندر وصوص بستشيو، وده سعره 80 جنيه، ونقدر نقول إنه وجبة متكاملة بمعنى الكلمة، مشبع وطعمه حلو، وعجبنا أن الكرواسون كان فريش وطري والصوص كتير وده كان مديه طعم جوسي.
نيجي بقى للقهوة! طلبنا آيس لاتيه بصوص البستشيو، الله على الجمال! قهوة حلوة والطعم ريتشي ومظبوطة على الآخر، ودي سعرها 145 جنيه.
تجربتنا في أونكل زاك كانت مميزة وإيجابية من جميع الجوانب، طعم حلو، جودة عالية، قعدة مريحة، وسعر معقول.
عنوانهم: مول جي 7 التجمع الخامس، القاهرة الجديدة.
التليفون: 01558118622.
