The Definitive Guide to Living in the Capital , Cairo , Egypt

لو بتدوروا على كافيه في مصر الجديدة تقدروا تقعدوا فيه بهدوء، تشربوا قهوتكم، تاكلوا حاجة خفيفة أو حتى تفتحوا اللاب توب وتنجزوا شوية شغل، فـ كاريبو كوفي Caribou Coffee ممكن يكون اختيار مناسب، خصوصًا فرع مصر الجديدة القريب من روكسي.

دخلنا الفرع ولقينا المكان مريح بشكل عام، والديكورات بسيطة وfيسيطر عليها استخدام الكراسي الخشبية، وده بيدي المكان شكل هادي ومناسب للقعدة الطويلة نسبيًا. كمان من الحاجات اللي لفتت نظرنا إن أغلب العاملين في المكان من الشباب، وكانوا ودودين ومتعاونين، والحماس الواضح عندهم بيضيف لطبيعة المكان وأجوائه.

لكن فيه حاجة ضايقتنا فعلًا، وهي حالة بعض الكراسي. لقينا أكتر من كرسي شبه مكسور ومش مريح في القعدة، واضطرينا نغير بنفسنا أكتر من كرسي علشان نلاقي واحد ثابت ومريح. دي حاجة بسيطة في ظاهرها، لكن مهمة جدًا في كافيه الناس ممكن تروح له علشان تقعد فترة طويلة، ونعتقد إن تغيير الكراسي أو صيانتها هيكون تحسين واضح للتجربة.

أما بالنسبة للأكل والشرب، فطلبنا عرض الـ Duet Club Sandwich مع لاتيه بـ240 جنيه، وكانت تجربة كويسة. الساندوتش كان فريش وطعمه جيد، واللاتيه كان حلو، وعمومًا المشروبات في كاريبو من الحاجات اللي ممكن نعتمد عليها لو داخلين مخصوص علشان قهوة أو مشروب.

وجربنا كمان Apple Tart، وكانت من الحاجات اللي عجبتنا جدًا، خصوصًا لو بتحبوا الحلويات اللي فيها طعم التفاح والقرفة وبتدوروا على حاجة خفيفة مع المشروب.

كمان طلبنا شاي بـ85 جنيه، وده بيخلي عندكم اختيار أبسط لو مش من محبي القهوة أو لو عايزين تقعدوا مع مشروب سخن من غير ما تدفعوا مبلغ كبير.

ومن أكتر الحاجات اللي عجبتنا في كاريبو هي طبيعة القعدة نفسها. المكان ينفع لقعدة سريعة، وينفع كمان لو عايزين تغيروا جو وتقعدوا شوية، والأهم إنه مناسب نسبيًا للي بيحبوا يشتغلوا من الكافيهات؛ تقدروا تاخدوا اللاب توب وتقعدوا تخلصوا شغلكم مع مشروب وحاجة خفيفة.

وبالنسبة للأسعار، فأسعار كاريبو في المجمل معقولة مقارنة بتجربة الكافيه ونوعية المنتجات اللي جربناها، خصوصًا لو هتستفيدوا من العروض الموجودة على بعض الوجبات والمشروبات.

وأخيرًا..

تجربتنا في Caribou Coffee مصر الجديدة كانت كويسة بشكل عام. المكان مريح، العاملين ودودين، المشروبات والحلويات جيدة، والأسعار مقبولة، والقعدة مناسبة سواء لخروجة بسيطة أو لتغيير الجو والشغل على اللاب توب.

لكن لو إدارة المكان هتسألنا عن أهم حاجة محتاجة تتحسن، فهتكون الكراسي من غير تفكير. لأن مكان عنده قعدة حلوة زي كاريبو يستاهل إن كل كرسي فيه يكون مريح وثابت.