محمد عبد الواحد.. أحلام وهموم ممثل شاب في دروب القاهرة
الفن المصري الفنان محمد عبد الواحد الوسط الفني حلم التمثيل نجوم القاهرة
Cairo 360
بسنت محمد
مصر مليانة مواهب في مجال الفن والتمثيل، لكن أحيانًا الشللية بتحكم، وهنا بتضيع أحلام وبيخسر المشاهد متعة التعرف على مواهب جديدة. في الحوار ده هناخدكم في رحلة للتعرف على هموم وأحلام ممثل مصري شاب، وتفاصيل رحلته للبحث عن فرصة في دروب القاهرة! في السطور الجاية رحلة الممثل الشاب محمد عبد الواحد من مكاتب الكاستينج مرورًا بالسوشيال ميديا، ووصولًا إلى الشاشة.
كلمنا عن خلفيتك الفنية.. وإيه الصعوبات اللي بتواجهك في عالم التمثيل؟
وأنا طفل كنت بعمل اسكتشات تمثيل في المدرسة، ولما كبرت قدمت في مسابقات تمثيل لكن لم أوفق فيها، بعدت شوية عن الحلم لكنه كان عايش جوايا، كنت دايمَا بتفرج على الأعمال الفنية بنظرة مختلفة غير نظرة المشاهد العادي، التحقت بورش تمثيل، بعدها بدأت رحلتي مع مكاتب الكاستينج في دروب القاهرة، واللي وفرت لي فرص ظهور في مشاهد تمثيلية بقول فيها جمل بسيطة، وفي خط موازي كنت بعرف الناس بيا على السوشيال ميديا، وعملت مقاطع على تيك توك حققت نجاح، وأخيرًا وبتوفيق من ربنا كلمني المخرج الكبير جميل مغازي علشان المشاركة في مسلسل “السجل الأسود” لرمضان الجاي.
هل بتحس باليأس والإحباط أحيانًا وإنك مش هتقدر تكمل المشوار ده؟
إحنا بشر كلنا بنوصل للحظات دي، لكن اللي بيفرق هنا الإرادة.
لما بتدخل بلاتوه بتحس بإيه؟
مش هقدر أوصف الراحة النفسية اللي بحسها، لإني بعمل حاجة بحبها، برغم إني ممكن أكون موجود في اللوكيشن 48 ساعة متواصلين، علشان هقول جملة واحدة بس.
كوميدي ولا دراما إيه اللون الفني اللي عايز تكمل مشوارك فيه؟
لحد دلوقتي بقدم فيديوهات كوميدية خفيفة على تيك توك، لكن مش حابب أحصر نفسي في كوميدي بس، أنا ممثل، وأحب أعمل كل الألوان الفنية.
في رأيك الشباب الموهوب محتاج إيه علشان يوصل لعالم التمثيل بجد؟
لو نقابة المهن التمثيلة وفرت ورش جديدة للممثلين الشباب، ولكل اللي نفسهم يتعلموا تمثيل، بعيدًا عن الورش الخاصة لإنها بتكون بمقابل مادي، وأوقات بتكون تضييع للوقت بهدف الربح مش أكتر، فمحتاحين من النقابة تزود عدد الورش وتقلل الوقت ما بين الورشة والتانية.
في وقتنا ده، السوشيال ميديا ممكن تصنع فنان؟
السوشيال ميديا مش بتصنع فنان لكن ممكن تقدم فنان، هي المتاحة دلوقتي للشباب الموهوب بعيدًا عن الشللية والحسابات الأخرى، من خلالها الجمهور بيعرف يختار الشخص اللي عنده حاجه يقدمها فعلًا، أنا شخصيَا اترشحت لمسلسلي الجديد من خلال المحتوى اللي بقدمه على السوشيل ميديا.
إيه الرسالة اللي عايز توصلها للناس من خلال فيديوهاتك على تيك توك؟
عايز الناس تعرفني أكتر، بجانب إني عايز أفرح الناس أو أرسم بسمة على وشوشهم، في اللحظة دي بكون طاير من الفرحة.
هل في يوم بكيت لأنك حسيت إن ظروف وشروط النجاح في المجال الفني مش عادلة؟
بكيت أكتر لما حسيت إني بدأت طريقي بجد، وإن مجهودي مراحش على الفاضي، وبدأت تجيلي فرص كويسة.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
