The Definitive Guide to Living in the Capital , Cairo , Egypt

الزمن يشهد أن المصريين مبدعين جدًا في تحويل كل المناسبات إلى مواسم مبهجة لكل الفئات باختلافاتها الفكرية والاجتماعية والثقافية، ومناسبة زي “مولد النبي” خضعت لعملية التحويل دي.. وزي ما الأطفال هيلاقوا البهجة في العروسة والحصان، والقرايب هيلاقوا البهجة في علبة الحلاوة اللي جايالهم هدية، والأسرة هتلاقي البهجة في اللمة حوالين الأفلام الدينية الكلاسيكية؛ برضه السميعة وأصحاب المزاج الفني الموسيقي هيلاقوا بهجتهم في عدد كبير من الليالي والحفلات اللي بتعملها فرق الإنشاد والمديح في كل المسارح ودور العرض.. وإحنا هنا هنحاول نديكم دليل مختصر لأهم الحفلات المتعلقة بالمولد اللي هتستضيفها القاهرة اليومين دول.

المولوية في الساقية:

دي أولى الحفلات اللي هتقام احتفالًا بالمولد وهتكون يوم الخميس 30 ديسمبر على مسرح قاعة النهر بساقية الصاوي في تمام السابعة مساءً، والمولوية هي فرقة غناء واستعراض في نفس الوقت بيقودها المنشد عامر التوني اللي بيأدي قصائد كبار الصوفية بألحان مصرية خفيفة وبيكون مصاحب لإنشاده استعراض فرقته برقصات وتمايلات دراويش المولوية.. سعر تذكرة الحضور 50 جنيه مصري، ولتفاصيل أكتر ادخلو هنا.

الشيخ إيهاب يونس في الساقية:

في يوم الجمعة 1 ديسمبر هيستضيف مسرح قاعة الحكمة بالساقية حفل الشيخ الأزهري صاحب الصوت القوي العميق والطلة البهية الشيخ “إيهاب يونس” في تمام السابعة والنصف مساءً، والشيخ “إيهاب” بيقدم عادةً خليط منوع من أداءات عمالقة المديح والابتهال الإذاعي بالإضافة لشوية أغاني على طريقة فرق الموسيقى العربية غير بعض التفاريد الحرة اللي هو مميز بيها جدًا.. سعر تذكرة الحفلة 35 جنيه، والتفاصيل الزيادة تعرفوها من هنا.

احتفالية دار الأوبرا المصرية:

لأصحاب الذوق الكلاسيكي الوقور، دار الأوبرا زي ما عودتنا في كافة المناسبات مخصصة ليلة فنية مميزة للاحتفال بالمولد يوم الجمعة 1 ديسمبر برضه، والاحتفالية هتتم على فقرتين: الأولى منهم هتكون مخصصة لفرقة الإنشاد الديني التابعة للأوبرا بقيادة د. علاء عبد السلام، والفاصل أو الفقرة التانية هتكون مخصصة للفنان الكبير “محمد ثروت”، هتبدأ الفعاليات في تمام الثامنة مساءً، وأسعار التذاكر: 50، 75، 100 جنيه، والتفاصيل تلاقوها هنا.

الحضرة في مسرح الجمهورية:

مسرح الجمهورية التابع لدار الأوبرا هيستضيف يوم الأحد 3 ديسمبر في تمام الثامنة مساءً فرقة الحضرة للإنشاد الصوفي، وهي فرقة بتنقل تراث الحضرات الصوفية المصرية من المساجد للمسارح، سواء في فقرة المديح وإنشاد القصائد أو في فقرة الذكر الجماعي الجهري اللي بتكون في آخر العرض، والفرقة بتتميز بتنوع كبير جدًا في طبيعة اللي بتقدمه وفي أصوات المؤدين كمان وده بيعيش المستمعين في حالات مختلفة ومتفاوتة من الاستمتاع الفني والروحي.. أسعار تذاكر الحفلة هيكون: 50، 75 جنيه.. والتفاصيل كلها موجودة هنا.

الرضوان في مسرح الجمهورية:

فرقة الرضوان السورية بمدائحها الشامية الجميلة الخفيفة هتحتفل مع جمهورها بالمولد يوم 6 ديسمبر في تمام الثامنة مساءً على مسرح الجمهورية، أسعار تذاكر الحضور 25، 35 جنيه، والتفاصيل تعرفوها من هنا.

وصلة سماع في الساقية:

في يوم 7 ديسمبر وعلى مسرح قاعة النهر بساقية الصاوي هتقدم فرقة “وصلة سماع” حفلتها بمناسبة المولد في تمام الساعة 6:30 مساءً، الفرقة اللي بتتكون من وجوه شبابية ذات أصوات مميزة وأداء جماعي قوي هيتزامن احتفالها بمولد النبي مع احتفالها بمرور 3 سنين على نشأتها، وده يخلينا مستنيين يوم مميز في التنظيم والمحتوى.. سعر تذكرة الحفلة 35 جنيه، والتفاصيل هنا.

أبو شعر في مسرح الجمهورية:

هنختم دليلنا مع فرقة سورية تانية هي فرقة الإخوة أبو شعر هيستضيفها مسرح الجمهورية يوم 8 ديسمبر في تمام الساعة 8:00 مساءً، الفرقة بتتميز بالأصوات الجهورية القوية والأداء الجماعي الموحد والمتناسق والأداءات اللي بتمزج بين القوة الشامية والخفة المصرية، أسعار تذاكر الحضور 50، 75 جنيه، والتفاصيل تلاقوها هنا..

كل مولد وأنتم طيبين، ومصر بخير.