The Definitive Guide to Living in the Capital , Cairo , Egypt

ومين مايحبش صوت كوكب الشرق أم كلثوم؟ الفنانة المصرية العظيمة اللي قدرت تجمع كل العرب على صوتها الأسطوري، وأصبحت رمز حقيقي للغناء المصري. وبمناسبة ذكرى وفاتها الـ 47 هنعرفكم على 5 معلومات عن متحف كوكب الشرق بالمنيل واللي رحلت عن عالمنا يوم 3 فبراير 1975.

1 – بمناسبة ذكرى وفاتها، أكد حاتم البيلي مدير متحف أم كلثوم في تصريحات إعلامية، إن دخول المتحف الفترة دي ولحد يوم 10 فبراير هيكون مجانًا، وأضاف إن إدارة المتحف قررت يكون الدخول مجانًا في الأسبوع الأول من فبراير من كل سنة.

2 – المتحف بيضم 9 فتارين لمقتنيات كوكب الشرق المتنوعة، وواحدة من الفتارين بتضم 8 فساتين ارتدتهم كوكب الشرق خلال تقديم أشهر أغانيها زي “الأطلال” و”أنت فاكر”، بالإضافة لفستان أهدته لها السفارة الباكستانية.

3 – المتحف بيضم البروش الماسي الشهير اللي كانت بترتديه أم كلثوم في أشهر حفلاتها، واللي بيعتبر واحد من المتعلقات النادرة اللي حصلت عليها وزارة الثقافة من مجوهرات كوكب الشرق.

4 – أم كلثوم كانت سابت البروش ده مع الكاتب الصحفي مصطفى أمين مؤسس جريدة الأخبار، وطلبت منه قبل رحيلها يتبرع بثمنه لمصر لو احتاجتها في عمل حربي، أو إيداعه في المتحف اللي هتنشئه الدولة لعرض مقتنياتها.

5 – المتحف بيستقبل يوميًا وفود عربية من المحيط إلى الخليج من عشاق كوكب الشرق، بالإضافة لأجانب من كندا والأرجنتين ودول شرق آسيا ودول أكتر في عالمنا.

عنوان متحف أم كلثوم: 1 شارع الملك الصالح، جزيرة الروضة، المنيل.