The Definitive Guide to Living in the Capital , Cairo , Egypt

كاميرا عكسية:

حط الكاميرا أمام المراية .. أيوه بالضبط كده.. لأ لأ خليك يمين شوية.. حاول تضبط الكادر صح.. تمام.. اعدل هدومك بقى.. هاه تمام؟ لأ فيه خصلة من شعرك باينة.. ضبط شوية .. هاه شايف نفسك فى الكاميرا ولأ فى المراية؟ ركز مع السؤال هـ نبدأ التصوير.. بلاتوه.. فيلم الثقافة آه.. الثقافة لأ.. كلاكيت أول مرة مشهد 2 ب..

مشهد 2 ب:

يظهر المذيع فى الكادر أمام المراية وهو بـ يقول:

بيت الوادى هو مصر.. طالما أن الوادى بـ يعبر عن مصر.. يبقى نسمى المكان بيت الوادى.. حاجة كده تتكلم عن الثورة وأحوالها والبلد والعيشة واللى عايشينها.. بيت الوادى مكان بـ يتكلم عن الثقافة والسينما وحرية النشر والتوزيع وسهولة النشر ومساعدة المهمشين فى الثقافة.. بيت الوادى حاجة كده تفرح..

مساعد مخرج أول:

يا بيه ما ينفعش دى مش طريقة كلام عن الثقافة.. يعنى إيه حاجة تفرح..

مساعد مخرج ثانى:

أنا مش فاهم حاجة من اللى اتقال هو فيه مكان يقدر يعمل كل ده.. بطلوا أحلام بقى..

مخرج الفيلم:

ششش.. سكوت بقى يا جماعة خلاص “الشوت” ده اتاخد والإنتاج بـ يقول مش هـ ينفع نعيد التصوير.. أحسنت يا أستاذ.. أحسنت..

المنتج:

هـ تخربوا بيوتنا بكثر الكلام عن الثقافة.. هى بـ تأكل عيش علشان نعملها فيلم.. كان إيه اللى ضربنى على دماغى وأنا بامضى العقد بس..

الفيلم الحقيقى:

ده كان تصورنا عن الواقع الثقافى لو اتعمل فيلم عن الثقافة.. وعن تحديدًا مكان ثقافى لسه جديد.. مش بـ يأخذ مساعدة من حد.. وماشى بالتمويل الذاتى بـ يحاول يعافر وسط ظلام القاهرة الصعب.. المكان ده اسمه بيت الوادى واللى قام بتأسيسه ثلاثة مهتمين بالثقافة.. الثقافة اللى بجد مش اللى فى البلاتوه..

م. شوقى عقل.. د. أحمد الخميسى.. المحامية صفاء زكى مراد، ولما قابلنا أ. مصطفى حسين مدير المكان أكد أن المكان قائم علشان يخدم الثقافة بشكل جديد.. شكل قائم على فكرة احترام الثقافة واعتبارها منتج لازم الناس يوصلوا إليه.

الناس:

وإحنا كـ “كايرو 360” ما كذبناش خبر.. وتحرينا وتقصينا عن الأحداث بتاعتهم علشان نقول للناس الآتى: بيان كايرو 360 عن بيت الوادى..

تناشد كايرو 360 أى شخص التعامل مع بيت الوادى لو: كان بـ يحب الثقافة بالفعل، عاوز يفهم ويحاور ويناقش، فاهم يعنى إيه الثقافة منتج، بـ يستقبل الرأى والرأى الآخر، بـ يحب الحاجات غير المعروفة واللى بـ تصنع ثقافة بجد، اللى مش عاوز ثقافة “تيك أواى” على الجاهز يعنى.

ثقافة الجاهز:

ولأن الحياة عبارة عن مجموعة محاولات ففيه ناس فى بيت الوادى بـ تحاول تصنع ثقافة بجد.. من غير تمويل ولا رعاية ولا أى حاجة.. هما بس بـ يحاولوا يقولوا أن مصر فيها ثقافة بجد وبـ يعملوا أحداث وندوات ومسابقات للقصص القصيرة وورش للشعر ونادى لسينما مختلف عن أى نادى سينما.. نادى بـ يحترم فكرة السينما وبـ يعرض السينما غير المهضومة.. بـ يهتم بسينما الواقع والحقيقة وبـ يركز على الفيلم الوثائقى الإبداعى..

الناس دى رسالتها هى مجمل أحداثهم ونشاطهم تطوير عن طريق الجدل وورش العمل والمناقشة علشان نوصل فى النهاية للمعرفة.