The Definitive Guide to Living in the Capital , Cairo , Egypt

الصور لمعبد دندرة في قنا

معبد “دندرة” الأثري في قنا، وقصر الثقافة، وجامعة جنوب الوادي، هيستضيفوا فعاليات أول مهرجان للموسيقى والغناء في محافظة قنا بصعيد مصر، والحدث المهم ده هيكون لمدة 6 أيام، في الفترة من 27 فبراير الجاري ولحد يوم 3 مارس الجاي.

والمهرجان هو أول حدث ثقافي فني بتنظمه محافظة قنا، وده تحت إشراف ودعم وزارة السياحة والآثار بالتعاون مع وزارة الثقافة. وعروض المهرجان هتشمل فعاليات لنجوم مصريين مهمين وفرق شبابية ناجحة، وفي السطور اللي جاية هنقولكم تفاصيل الحفلات كلها.

يوم الافتتاح 27 فبراير

هيُقام حفل الافتتاح داخل معبد “دندرة”، وفي الفقرة الأولى هنستمتع بفرقة بلاك تيما، أما الفقرة التانية فهتكون للمطرب مدحت صالح.

يوم 28 فبراير

هيُقام الحفل برضه داخل معبد “دندرة” وهيحييه كل من فرقة وسط البلد، والمطرب علي الحجار.

يوم 29 فبراير

هتنتقل فعاليات المهرجان لقصر ثقافة قنا، والفقرة الأولى هتحييها المطربة مي فاروق، اللي هتقدم حفلة “كلثوميات”، والفقرة التانية هتحييها فرقة الفنون الشعبية.

يوم 1 مارس

هتستمر الفعاليات داخل قصر ثقافة قنا، وهتحيي الفقرة الأولى نسمة عبدالعزيز وفرقتها، والفقرة التانية هتحييها المطربة دينا الوديدي.

يوم 2 مارس

هتنتقل الفعاليات لجامعة جنوب الوادي، بحفلة مميزة هيحييها المطرب هشام عباس.

يوم 3 مارس “حفل الختام”

هيُقام حفل الافتتاح على مسرح جامعة جنوب الوادي وهتحييه فرقة “مسار إجباري”.