The Definitive Guide to Living in the Capital , Cairo , Egypt

أهلًا بيكم في ليلة الأوسكار.. الليلة الأكثر أهمية في عالم السينما حوالين العالم.. لو عاوزين نشبه حفلة الأوسكار، ممكن نقول إنها حفلة جوائز نوبل لكن في المجال السينمائي!
حفلة الأوسكار الأولى في التاريخ كانت سنة 1929 وحضرها أقل من 300 شخص. جائزة الأوسكار عبارة عن تمثال من القصدير والنحاس بيتم دهانه بطبقة من الدهب بتغلف التمثال اللي طوله 34 سم ووزنه أقل من 4 كيلو بحاجات بسيطة.
الحفلة مش مجرد احتفاء بأهم الأفلام والممثلين على مدار السنة، هي كمان مناسبة لمتابعة أحدث موديلات الفساتين والبدل، وأحيانًا بتحصل حاجات بتغير شكل العالم، زي ما حصل سنة 2014 لما التقطت مقدمة البرامج الشهيرة إلين ديجينريس صورة بكاميرا التليفون الأمامية لعدد كبير من الفنانين، ودي كانت أشهر لقطة (سيلفي) في التاريخ، غيرت شكل صناعة التليفونات الذكية لحد وقتنا الحالي، وأصبح الناس حوالين العالم مهووسين بتصوير نفسهم بطريقة (السيلفي) اللي ما كانتش منتشرة قبل صورة حفلة الأوسكار.

جوائز أوسكار 2022
• أفضل فيلم: Belfast.
• أفضل ممثل: ويل سميث عن King Richard.
• أفضل ممثلة رئيسية: جيسيكا تشاستاين عن The Eyes of Tammy Faye.
• أفضل ممثلة مساعدة: أريانا ديبوز عن West Side Story.
• أفضل مخرج: كينيث برانا عن Belfast.
• أفضل فيلم أجنبي: Drive My Car- من اليابان.
• أفضل فيلم رسوم متحركة روائي لفيلم: Encanto.
• أفضل فيلم رسوم متحركة قصير: The Windshield Wiper.
• أفضل صوت: Dune.
• أفضل موسيقى تصويرية: Dune.
• أفضل مونتاج: Dune.
• أفضل مؤثرات بصرية: Dune.
• أفضل فيلم وثائقي قصير: The Queen of Basketball.
ويل سميث ضرب كريس روك!

أما الحدث الأغرب في أوسكار 2022 فكان من نصيب ويل سميث، اللي فاز بأول أوسكار له عن دوره في King Richard. (اقروا مراجعتنا له من هنا) لكن قبل إعلان فوزه، اتخانق مع مقدم الحفل كريس روك، واللي تنمر على حلاقة زوجة ويل سميث لشعر رأسها نتيجة إصابتها بمرض، فما كان من سميث إلا إنه قام من مكانه وضرب (كريس) قلم محترم! ثم رجع لمكانه تاني وقال له: (ماتجيبش سيرة مراتي على لسانك).. ودي أكتر ترجمة مهذبة للي قاله ويل سميث!
الناس على السوشيال ميديا في حالة انقسام ضخم بمجرد ما حصل الموقف ده.. بعضهم بيقول إن ويل سميث عنده حق أنه يضرب المتنمر على زوجته، وأن التريقة وإطلاق النكات على أمراض الناس مش حاجه ظريفة أبدًا، وتصرف غير مقبول.
البعض شاف أن تصرف ويل سميث كان عصبي بزيادة، وكان ممكن ياخد المايك ويعلن اعتراضه على التنمر على زوجته، وكان هيحصل على احترام الجميع وتقديرهم بدون ما يتصرف بهمجية.
أما البعض الأخر كان شايف أن الحفلة كانت مملة، وكان لازم يتم الاتفاق على فقرة ترفيهية تزود عدد المشاهدين وتخلق حالة جدل، بالتالي تم الاتفاق على التمثيلية اللي عاوزين يقنعونا إنها كانت موقف عفوي.
بعيدًا عن الخناقة، شركة آبل فرحانة بفوز فيلمها CODA بـ3 أوسكار، وده الحلم اللي سعت له آبل من بداية إطلاقها خدمة Apple TV+ لمستخدميها، لمنافسة منصات المشاهدة التانية زي ديزني و نتفليكس.
وبكده تكون انتهت ليلة من أغرب ليالي الأوسكار، ليلة بدأت بفساتين السهرة، وانتهت بفوز وفرحة كبيرة، وفي المنتصف منها شوفنا ضربة قلم وتنمر على الهواء مباشرة!