“آرت نارتي”.. مهرجان فني وثقافي بيجمع أطفال الصعيد
المشاركة في مهرجان آرت نارتي تفاصيل مهرجان آرت نارتي مكان مهرجان آرت نارتي مهرجان آرت نارتي للأطفال مهرجان الأطفال
Mohamed Talaat
في 2017، انطلق في مصر أول مهرجان موجه لأطفال الصعيد، وبالتحديد كان لأطفالنا في أسوان، وأنطلق المهرجان باسم “آرت نارتي”، وكانت رسالته نشر قيم الخير والفن والجمال، واستمر المهرجان من وقتها يقدم رحلات لكل مكان على قدر المستطاع في أوقات مختلفة ولكن مهما يلفوا بيرجعوا تاني لأسوان، والسنة دي في 2024 بتنطلق النسخة السابعة لمهرجان “آرت نارتي” وهنعرفكم على المهرجان وتفاصيله خلال السطور الجاية.
مهرجان “آرت نارتي” هو مهرجان تطوعي بيشارك فيه كتير من المؤمنين برسالة الفن والثقافة والعلوم والسياحة وغيرهم، والسنة دي هينطلق يوم 18 يونيو وهيستمر لحد يوم 28 يونيو 2024، وهيكون خلال الـ10 أيام دول فيه فعاليات كتير تحت عنوان “تأمل – تفكر – تدبر”، وهيقام زي كل سنة في منطقة غرب سهيل المعروفة أنها من أجمل مناطق محافظة أسوان.
كعادة المهرجان كل سنة أنهم بيكرموا فنانين شاركوا فيه ومازالوا وسطنا أو رحلوا عن عالمنا، وكمان بيكون فيه ورش عمل وتدريبات لما يقارب من 3500 طفل، في كل أنواع الفنون والأنشطة الثقافية والرياضية المختلفة، هيتعلموا فيها الأطفال فنون الإبداع والخيال، والهدف يكون عندهم دافع للنجاح والثقة بالنفس وإيجاد طريق للتأمل والتفكير والتدبر.
السنة دي المهرجان هيكون فيه أكتر من 100 متطوع بشكل رسمي تم اختيارهم بعناية من كل أنحاء مصر، وهتكون مهمة المتطوعين التنظيم وتسهيل كل حاجة علشان نجاح المهرجان، والمتخصصين هيكونوا نواة لأنهم يعلموا الأطفال كل أنواع الفنون من خلال ورش العمل والتجارب الفنية وتطوير المهارات الابداعية وغيرها.
القائميين على مهرجان آرت نارتي بيسعوا لتحويله إلى مهرجان دولي قريبًا، وأنه يكون مساهم في الترويج السياحي والفني والثقافي لمصر، ونشر الثقافة المصرية لأطفال مصر والعالم.
بنتمنى التوفيق لكل فريق المهرجان ونأمل أنهم يوصلوا لكل بر مصر ويخرجوا لنا مواهب مدفونة محتاجة حد يكتشفها، وتقدروا تشاركوا بأطفالكم في المهرجان من خلال التواصل مع الصفحة الرسمية من هنا.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
