The Definitive Guide to Living in the Capital , Cairo , Egypt

وزارة الثقافة قررت تخلي سنة 2025 سنة خاصة باسم كوكب الشرق “أم كلثوم”، بمناسبة مرور 50 سنة على رحيلها، وده تقدير لدورها اللي شكل وجدان الملايين بصوتها الخالد، اللي مهما مر الزمن، لسه بيعبر عن مصر وتراثها الفني العظيم.

وزير الثقافة، د. أحمد فؤاد هنو، أكد إن الاحتفال مش مجرد تكريم، لكنه فرصة لإحياء تراث أم كلثوم وتقديمه بشكل جديد للأجيال اللي ما لحقتش تعيش زمنها. الوزارة بتجهز لسنة كاملة مليانة حفلات موسيقية، معارض فنية، مسابقات لاكتشاف الأصوات الواعدة، وعروض تراثية بتعيد تقديم أغانيها بروح عصرية، كل ده علشان صوت الست يفضل حاضر في حياتنا.

متحف أم كلثوم يفتح أبوابه بالمجان
أحلى مفاجأة لعشاق كوكب الشرق، هي إن “متحف أم كلثوم” هيكون مفتوح مجانًا طول شهر فبراير، علشان الناس تقدر تشوف مقتنياتها الأصلية، من فساتينها لنظارتها لخطاباتها النادرة، وتسمع تسجيلات صوتية بتوثق أهم محطاتها الفنية.

اعرفوا أكثر عن متحف أم كلثوم من مقالنا هنا: عودة لزمن “الست” الجميل.. رحلة مصورة لمتحف أم كلثوم بالقاهرة

دار الأوبرا على خط الاحتفال
دار الأوبرا المصرية أعلنت عن حفلات ضخمة جوه مصر وبره، أبرزها في باريس بحضور نجوم كبار، وكمان حفلات داخل مصر ضمن سلسلة “كلثوميات” علشان نستمتع بروائعها بصوت نجوم الجيل الجديد.

كمان هيئة قصور الثقافة هتنظم “مهرجان أم كلثوم للموسيقى والغناء”، وهيبدأ من قريتها “طماي الزهايرة” في الدقهلية، وهيطوف محافظات مصر بحفلات ومعارض وورش حكي عن مشوارها، علشان الأجيال الجديدة تتعرف على الست من البداية للنهاية.