The Definitive Guide to Living in the Capital , Cairo , Egypt

الصورة الرئيسية: elnaz asadi

رمضان خلاص بيودعنا، وبدأنا نسمع أغنية تم البدري بدري في الإذاعة وفي التليفزيون، لأن فعلًا “الأيام بتجري”، وشهر رمضان كان فرصة للمدخنين أنهم يقللوا التدخين بدرجة كبيرة بسبب عدد ساعات الصيام، وعلشان كدة ممكن يبطلوا التدخين خالص بعد رمضان.

في السطور الجاية هنعرفكم على نصائح نفسية هتساعدكم على التوقف تمامًا عن التدخين بعد رمضان، والنصائح دي نشرها موقع “راديو سوا”، نقلًا عن مجموعة من أبرز الوكالات والجمعيات الصحية الأمريكية.

خذ قرار التوقف عن التدخين بنفسك

ده أكبر حافز هيساعدك في مقاومة إغراءات التدخين، لإنه ببساطة جاي من جواك، أنت اللي قررت، وأنت اللي عارف ليه هتبطل، من غير أي مؤثر خارجي، علشان كده مهم تحط قائمة بأسباب قرارك تبطيل السجاير.. وابعد عن الأسباب الكلاشيه زي “لأنه مضر بالصحة” وخليها مثلًا  “عايز أحمي عيلتي من التدخين السلبي” أو “عايز أكون قدوة كويسة لأولادي” أو”عايز أوفر فلوس”.

مهم كمان تحط خطة للتعامل مع أعراض تبطيل التدخين، واللي منها الاكتئاب والتوتر وصعوبات النوم وسرعة الغضب وصعوبات التركيز وزيادة الوزن.

اطلب المساعدة

مش عيب على فكرة، روح وقول لعيلتك وأصحابك اللي بتثق فيهم إنك نويت الإقلاع عن التدخين، واطلب منهم يدعموك في الأيام والأسابيع الأولى، لكن مهم تحدد لهم يدعموك إزاي، ودي بتختلف من شخص للتاني.

وطبعًا مهم تتخلص من أي منتجات ليها علاقة بالتدخين حواليك، سواء في الشغل أو في العربية أو في البيت، زي التبغ أو الولاعة أو الكبريت أو طفايات السجاير، وحاول تتخلص من روائح الدخان في الأماكن اللي بتبقى موجود فيها باستمرار، لإن ريحة الدخان هتستفزك.

 تليفونك ممكن يساعدك

فيه تطبيقات وحلول إلكترونية كتير هتساعدك على الإقلاع عن التدخين، فهتلاقي تطبيقات بتقدم نصايح ومعلومات وعبارات تشجيع وتحليلات تفاعلية لوضعك كمدخن، وهتوفر لك فرصة تتكلم مع ناس في نفس مرحلتك بيحاولوا يبطلوا، وهتتبادل الخبرات معهم.

من التطبيقات المجانية المتوفرة لأجهزة “آندرويد” ومدعومة باللغة العربية كمان، تطبيقات “أضرار التدخين ملف شامل” و”نصائح لترك التدخين”، و”التدخين وأضراره”.

ومن التطبيقات المجانية الممتازة بالإنجليزي لأجهزة “آبل”:

 LIVESTRONG MyQuit Coach

Quit It Lite

stop smoking now

Quit Smoking لأجهزة آندرويد.

Quit START المتوفر لأجهزة آبل وآندرويد.

ممكن كمان تقرأ مدونات لناس بطلوا تدخين، أو تتابع حسابات على تويتر وفيسبوك بتبعت معلومات يومية عن أضرار التدخين ونصائح وعبارات تحفيزية، أو تتفرج على فيديوهات عن أضرار التدخين وطرق الإقلاع عنه.

ابدأ برنامج رياضي

الرياضة بتلعب دور مهم جدًا في تقليل شهيتك للسجاير للثلث تقريبًا، ودي دراسة علمية اتعملت في جامعة “إكسيتر” في بريطانيا.

الدراسة قالت إن المدخنين اللي بيمارسوا الرياضة، فرص نجاحهم في الإقلاع عن التدخين بتوصل لـ 55% مقارنةً باللي مش بيمارسوا رياضة، وكمان هتقل فرص رجوعهم للتدخين بنسبة 43%.

ده غير إن الرياضة هتساعدك تخس، أو بمعنى أدق، هتساعدك في تجنب زيادة الوزن اللي تعتبر واحدة من أبرز أعراض الإقلاع عن التدخين، وكمان هتساعدك في تعديل مزاجك، وتحسين نومك.

هتبطل فجأة أو بالتدريج دي حاجة ترجع لك

المعهد القومي للسرطان أكد إن التوقف المفاجئ عن التدخين أسلوب ناجح بالنسبة لبعض المدخنين، لكن مش شرط يكون ناجح عند الكل، لإن فيه مدخنين الخطوات التدريجية بتكون أفضل بالنسبة لهم، وعلشان تعرف إيه المناسب ليك، راجع دكاترة متخصصين أو دكاترة نفسيين.

وعلى العموم فيه دراسة بريطانية أكدت إن اللي بيتوقفوا عن التدخين بشكل مفاجئ أو بشكل تدريجي الاتنين نتايجهم واحدة.