The Definitive Guide to Living in the Capital , Cairo , Egypt

القاهرة غنية بخدماتها عالية الجودة في السبا، النوادي الصحية وصالونات
الشعر في فنادقها الخمس أو الأربع نجوم، رغم أن الخدمة بـ تبقى غالية شوية لكن
الجودة والمهارة تستاهل الثمن ده. بس للأسف ده ما كانش الموقف في صالون «شريف
عدنان – Sherif Adnan» في فندق
هيلتون الزمالك ريزيدنس.

الصالون افتتح من سنة فاتت في نفس الوقت
اللي فيه فندق سفير بقى فندق هيلتون الزمالك ريزيدنس، أول ما الناقد دخل الصالون
كان شكله كأنه لسه مفتوح جديد لأن كان شكله نظيف جدًا ودي كانت حاجة كويسة وكمان علشان
ندرة المنتجات التجميلية الموجودة للاستخدام أو الشراء، خلي بالك لو رحت الصالون
في الهيلتون هـ تلاقي كل المنتجات المتاحة هي «بانتين» و«لوريال» وكمان المنتجات
الموجودة مش كثيرة قوي.

بس اعرف أنت
عايز إيه بالضبط وأنت داخل الصالون علشان مافيش قائمة منتجات أو أسعار موجودة، ودي
حاجة مش كويسة قوي خاصة لو أنت عامل حسابك على ميزانية معينة وبـ تحاول تحدد إيه
اللي تقدر تجيبه أو تعمله.

إزالة الشعر
بالفتلة بـ 20 جنيه، ولو أنت عاوز نصيحة لرسم الحواجب مش بس تنظيفها مش هـ تلاقي
الخدمة دي هنا، إزالة الشعر بالشمع موجود في الصالون، ومافيش سعر محدد لأنه بـ يقول
أن الأسعار بـ تختلف.

المانيكير بـ
40 جنيه والباديكير سعره بـ 50 جنيه، ما كانش فيه مكان مخصص لعمل الباديكير والمانيكير
وما كانش فيه أحواض للباديكير، البنت بتاعة طلاء الأظافر هـ تيجي تقعد جنبك. وجهز
نفسك أنك هـ تمسك طبق المياة على رجلك، ولو فيه شكل معين في دماغك لأظافرك قول
اللي أنت عايزه يا إما مافيش فرصة ثانية.

زي معظم الأماكن هـ تلاقي مساج للرأس
مع الشامبو. “سام” بـ يساعدك في اختيار قصة الشعر اللي عايزها وأكثر
حاجة تناسب وجهك وشعرك، بس خد بالك أن ممكن القصة تطلع أقصر من اللي أنت عايزه، غسيل
الشعر وقصه للسيدات بـ 100 جنيه ولو أنت عاوزة تعملي تسريحة في شعرك بـ 70 جنيه،
غير كده هـ تخرجي من الصالون وشعرك شبه مجفف بس بالسيشوار. 

نصف الصالون مخصص لحلاقة الرجال، أسعاره
بـ 60 جنيه. ولأن الصالون مافيهوش عاملات بنات كثير غير البنات بتوع المانيكير فالأفضل
يكون صالون للرجال.

روح الصالون وأنت معاك فلوس كاش، ولو
حاولت تدفع بالكارت هـ يقولوا لك أن الماكينة مليانة وهـ يخلوك تنزل تحت لماكينة ATM.

الصالون بـ يعمل
الحاجات العادية وبـ يعملها كويس، بس بالأسعار دي من الأفضل أنك تروح صالون ثاني أحسن
وبـ يقدم خدمة أفضل.