The Definitive Guide to Living in the Capital , Cairo , Egypt

“ربى أطلق لسانى وفك رهانى وأخرس شيطانى واجعل حديثى لوجهك لا حديث رياء وسمعة”.. بالكلام اللى فات بدأ مصطفى حسنى أول كلامه فى أول حلقة من البرنامج.. البرنامج اللى بـ يحكى فيه عن إزاى تروح لطريق ربنا فى الوقت اللى كل الناس بـ تتكلم عن السياسة، كان لازم يبقى فيه برنامج بـ يحاول يقرب من المشهد الحالى للبلد ويحلل اللى بـ يحصل لكن بعيد عن السياسة. كان لازم يكون فيه برنامج بـ يقرب من المشهد على طريق الله ولأن طول ما العمر بـ يعدى بك بـ يأخذ لطريق إما إلى الله وطاعته أو طريق الدنيا واللذة الوقتية.. كان لازم نتعرف على الطريق.

ولأن فاتحة الكتاب أول سورة بـ تقابلك فى المصحف فلازم تتأملها وهـ تلاقى أن الحمد اللى فى الأول كله بـ يأخذك فى الآخر لحد الدعاء (أهدنا الصراط المستقيم)، الصراط اللى كان الرسول الكريم صلى الله عليه وسلم بـ يأخذ خشبة ويرسم خط فى الرمل ويقول: “هذا سبيل الله” وحط خطوط يمين وشمال وقال: “هذا سبيل الشيطان” على كل سبيل منها شيطان يدعو إليها ثم قرأ النبى: (وأن هذا صراطي مستقيمًا فاتبعوه ولا تتبعوا السبل فـ تفرق بكم عن سبيله ذلكم وصاكم به لعلكم تتقون).

فى البرنامج هـ تتعرف على فكرة الطريق وإزاى تقدر تعبد ربنا بأشكال مختلفة يعنى مش عبادة الصلاة والصوم والزكاة والحج وبس.. فيه حاجات ثانية كثير، يعنى مثلًا أنك تفيد المجتمع، أنك تشتغل، أنك تعمل أى حاجة تبقى قاصد بها ربنا.. فى كل الحلقات لازم تخلى بالك من أول واحد مشى فى الطريق على بصيرة وهو النبى صلى الله عليه وسلم.

الطريق يا جماعة مش كله سهل فيه أماكن سهلة وفيه أماكن صعبة اختلف عليها الناس أو بـ تبقى صعبة على النفس وفيه زاد لازم يكون معاك وأنت على الطريق علشان توصل.. توصل لإيه؟ سؤال مهم وإجابته تتلخص فى حاجتين: رضا الله، والجنة.

صراحة أداء مصطفى حسنى مميز بـ يخليك تركز معاه وبـ يقدر يشدك للى بـ يقوله، عنده طلاقة وراحة فى الكلام تحببك فيه.. والبرنامج إخراجه هادى عبارة عن مجموعة كادرات لمصطفى داخل الستوديو.. وزيه زى أى برنامج دينى محترم إنتاجه هادى من غير إسراف.. هو ستوديو بـ يتكلم فيه مصطفى حسنى.. وتقارير خارجية مع شخصية بـ تتكلم عن ربنا.

المميز فى تقارير البرنامج أنه بـ يجيب ناس من الشارع تتكلم عن الله وقد إيه كلامهم بـ يبقى طالع من القلب وتحس قد إيه لسه فيه خير.. وفيه تقرير ثانى مميز مش لازم يجيب شيوخ لكن بـ يجيب شخصيات مختلفة، وكل شخصية بـ تحكى عن تجربتها مع الطريق وإزاى وصلت لمحبة ربنا وقررت تعبده.. تصدقوا أن منهم واحد دخل الطريق من (السلام عليكم) قالها له طفل صغير بـ يمسح الأحذية؟ لكنه قالها بقلبه وبهدوء دخل قلب الرجل فـ قرر يكون على الطريق.

جرب لما تسمع برنامج دينى تطبق اللى بـ ييجى فيه علشان توصل بالفعل للطريق وتعرف ربنا وتعرف النبى كويس.. جرب علشان توصل يمكن ساعتها تحس بالسلام.