The Definitive Guide to Living in the Capital , Cairo , Egypt

زي ما رمضان موسم مسلسلات هو كمان موسم برامج، صحيح عددها أقل من المسلسلات بكثير لكنها موجودة، وخصوصًا برامج المقالب والبرامج اللي بـ تعتمد على استضافة نجوم في الفن والرياضة.. بـ نشوف مجهود في الإعداد والتنفيذ علشان تقدر تنافس المسسلات، كايرو 360 بـ تقدم لكم أبرز البرامج اللي ممكن تشوفوها في شهر رمضان 2015 علشان تقدروا تختاروا من بينها على راحتكم:

رامز واكل الجو:

طبعًا مافيش شك أن برامج رامز جلال بـ تاخد المشاهدة رقم واحد بين البرامج وكمان المسلسلات، علشان كده بـ تحرص قناة mbc بقى لها أكثر من سنة على إذاعته حصريًا ساعة الإفطار لجذب أكبر قدر ممكن من الإعلانات، وسنة عن سنة بـ يحاول رامز أنه يقدم قدر أكبر من الجنون والخروج عن المألوف، وسنة عن سنة بـ يزيد الجدل حول البرنامج وكمان المشاهدة والإعلانات، السنة دي كل حاجة في الجو من خلال تمثيلية على الضيف اللي بـ يكون على متن طائرة بين القاهرة ودبي، وفجأة بـ يُقال أنه فيه عطل في الطيارة ولازم ينط، وسط لحظات من الرعب والخوف بـ تبدأ الحلقة تسخن، البرنامج مدته 15 دقيقة من إعداد وتقديم رامز جلال، وإخراج يوسف ياسين.

يعرض حصريًا على mbc مصر.

سر حليمة:

فكرة البرنامج بسيطة جدًا ومكررة لكنها بـ تراهن على المعلومات الجديدة اللي ممكن تقدمها، القصة كلها بـ تقوم على استضافة مجموعة من النجوم والكشف عن تفاصيل في حياتهم ما اتقالتش قبل كده، ضيوفها متنوعين بين مذيعين وممثلين ومطربين وسط جو أسطوري خيالي، بـ تلبس فيه حليمة ستايل غجري وأمامها بلورة سحرية، ومن إخراج إيهاب أبو زيد.

البرنامج حصري على قناة المحور.  

إنسان جديد:

الداعية الشاب مصطفى حسني تعود كل سنة أنه يقدم برنامج جديد، موجه بالأساس لفئة الشباب، السنة دي بـ يقدم برنامج اسمه "إنسان جديد" بـ يحاول من خلاله أنه يقدم وصفات مختلفة علشان المشاهد يتطهر من ذنوبه ويحاول يغير أسلوب حياته للأحسن وعلشان يكون أقرب لربنا، البرنامج محاط بكثير من السرية، لكن المعروف عنه أن المقدمة هـ يغنيها محمد جمال.

هـ يعرض على قنوات النهار، واقرأ.

التجربة الخفية:

مش عارفين مين فكر في حكاية الطيارة كمقلب قبل مين، لكن على نفس الطريق اللي مشي فيه رامز جلال بـ يمشي شادي ألفونس وخالد منصور اللي اشتهروا من خلال برنامج "البرنامج" وبـ يقدموا برنامج "التجربة الخفية"، الفرق بينه وبين برنامج رامز أن الضيوف فيه عارفين أنهم هـ ينطوا والعطل اللي بـ يُقال أنه موجود بـ يكون في المظلة اللي بـ ينطوا بها مش في الطيارة نفسها، كمان البرنامج تم تصويره في دولة أوربية مشهورة برياضة المظلات، طبعًا رمضان جاي والمشاهد هـ يقدر يحدد أيهما أسخن: رامز ولا الثنائي ألفونس ومنصور.

البرنامج هـ يعرض حصريًا على قناة النهار.

هبوط اضطراري:

برنامج مقالب كمان في الطيارة، من تقديم الممثل الكوميدي هاني رمزي، لكنه مختلف طبعًا عن البرامج الثانية اللي في طيارة، أولا لأن معمول فيه شغل تأليف من الشاعر والمؤلف عادل سلامة، البرنامج متصور في بيروت، الحلقة عبارة عن مراحل بـ يتعرض خلالها النجم لمجموعة من المواقف الكوميدية، وكل حلقة ولها السيناريو بتاعها، والجديد كمان أن الضيوف غير مألوفين زي ميرفت أمين، وإلهام شاهين.

البرنامج حصري على قنوات الحياة.

خواطر (الموسم 11):

للأسف السنة دي هـ يكون الموسم الأخير للبرنامج الشبابي الأشهر "خواطر" لمقدمه أحمد الشقيري اللى قرر أن الموسم الـ 11 يكون آخر سنة له، ما نقدرش ننكر أن خواطر من أهم البرامج اللي ارتبطت بالشهر الكريم، وسر تميزها مش بس أن موضوعها جاد وجذاب فـ ياخد الوقت نفسه، لكن لأنها بـ تقع في منطقة وسط لا هي دينية ولا هي فنية لا هي من عينة باقي البرامج اللي منتشرة في كل القنوات، وهـ يناقش موضوعات مهمة زي المياه وأهميتها، والبدانة وخطورتها.

خواطر 11 حصري علىmbc  مصر في رمضان.

نشرة أخبار الفراخ:

برنامج دمه خفيف على قناة القاهرة والناس، بصوت الإعلامي طارق نور، عبارة عن تريقة على الأحول والأحداث بصوت الفراخ، بـ ييجي بين فواصل البرامج على قناة القاهرة والناس، وهـ يكون فيه حلقات جديدة خاصة جدًا بمناسبة الشهر الكريم.

ما حدش بياكلها بالساهل:

برنامج من تقديم المذيعة الشابة آلاء لاشين، فكرته بـ تدور حول الرياضة والأكل، والحلقة عبارة عن استضافة لنجم من نجوم الفن يتكلم عن رياضته المفضلة وأهميتها في مكان ممارستها، وده بمصاحبة آلاء والشيف اللبناني ريتشارد، وبعد ما بـ يخلصوا لعب وكلام، بـ ييجي دور الأكل، ومن هنا جه اسم البرنامج "ما حدش بياكلها بالساهل".

البرنامج هـ يعرض على قناة المحور حصريًا.

الحكواتي:

برنامج لمحمد الغيطي على قناة Ten، امتداد لنفس الفكرة والاسم اللي اتعرض السنة اللي فاتت، على قناة التحرير، البرنامج عبارة عن حكايات بـ يحكيها الغيطي، والسنة دي حكاياته هـ تكون عن النساء في حياة الرؤساء، إزاي المرأة بـ تقدر تؤثر في حياة الزعماء والرؤساء والشخصيات الكبيرة.

هـ يعرض على قناة Ten حسب ما أعلن الغيطي بصورة مبدئية.

المشاغب:

على خطى رامز جلال.. يبدو أن اللاعب الشهير إبراهيم سعيد بـ يحاول يلاقي لنفسه مكان وسط مثيري الشغب، من خلال برنامجه الجديد والحصري مع مجموعة من نجوم الفن والرياضة، إبراهيم ما أعلنش عن التفاصيل الدقيقة لقصة البرنامج لكن البروموهات بـ توضح حالة غضب شديدة عند الضيوف اللي بـ يكونوا موجودين جوه شقة فيها عدد كبير من الناس، يبدو أن البرنامج سخن لدرجة أن 6 ضيوف رفضوا إذاعة حلقاتهم منهم المطرب سامو زين.

البرنامج هـ يعرض حصريًا على قناة المحور.

الإيمان والعصر:

برنامج للداعية الشهير عمرو خالد، بـ يتكلم عن الدين بمفهوم عصري، بـ يناقش قضايا كثير زي الصيام والأخلاق، البرنامج مش مقتصر على عمرو خالد فقط، لكنه بـ يستضيف فيه مشايخ من بلاد مختلفة، علشان يلاقوا حلول للمشاكل اللي بـ تواجه المسلمين زي محاولات تشويه الدين، وربط الدين بالعنف والتطرف، وتزايد الإلحاد وإزاي فيه حلول من الدين والسنة النبوية لمشاكل كثيرة بـ تواجه الناس كانوا فاكرين أن مالهاش حل.

البرنامج هـ يعرض على قناة mbc مصر، وTen.

 برامج مكملة في رمضان:

بعض البرامج المعتادة في الأيام العادية هـ تكمل في رمضان زي "ساعة مع شريف" و"دوس بنزين" دول مكملين على المحور، كمان برنامج "الستات ما يعرفوش يكدبوا" مكمل في رمضان تحت عنوان "الشيف ومفيدة" على cbc.

ترددات القنوات:

mbc مصر: 11470 v (عمودي) 27500 5/6

المحور: 11823 v (عمودي) 27500 ¾

القاهرة والناس: 11765 h (أفقي) 27500 5/6

الحياة: 10892 h (أفقي) 27500 ¾

النهار: 11488 h (أفقي) 27500 ¾