The Definitive Guide to Living in the Capital , Cairo , Egypt

مهما طال الوقت، ومهما شوفنا أعمال لها علاقة بالجريمة والرعب، هيفضل فيه مكان خاص في قلبنا للدراما العائلية، بداية من مسلسلات استمرت لمواسم كاملة كتيرة زي يوميات ونيس، أو الأعمال الأحدث زي (سابع جار) و(أبو العروسة) وغيرها. مسلسل (إيجار قديم) بينتمي للدراما الأسرية اللي بنحبها، ويعتبر إضافة قوية ومؤثرة وتستحق الاحترام.

نظام (الإيجار القديم) هو نظام إيجار كان معمول بيه في مصر لوقت طويل، بيضمن للمستأجر أنه يفضل موجود في الشقة ولا يغادرها، طالما مستمر في دفع إيجارها، وابن المستأجر يقدر يستمر في نفس الشقة، طالما كان مقيم مع أهله فيها. ومع تطور الزمن وارتفاع الأسعار، فضلت عقود الإيجار مستمرة بقيمتها القديمة، ده تسبب في ظلم لناس كتير من أصحاب العقارات.

المسلسل بيلقي الضوء على المشكلة دي من خلال قصة رمزي (شريف منير) اللي بيضطر يرجع للعمارة اللي بيملكها، علشان يتفاوض مع السكان على أنهم يتركوا له شقة واحدة على الأقل يقيم فيها، علشان يلاقي نفسه وسط مجموعة من القصص المختلفة لكل واحد من السكان، ويدخل في نزاع قانوني مع ابن واحد من أصحاب الشقق دي (محمد الشرنوبي). وفي وسط النزاع ده بنبدأ نشوف باقي قصص السكان.

أحلى ما في مسلسل (إيجار قديم) أن صناعه عارفين جمهورهم المستهدف كويس، وهو الجمهور اللي بيحب الدراما العائلية. بالتالي المسلسل صالح للمشاهدة من كل أفراد الأسرة بدون قلق، بالإضافة لأنه بيناقش مجموعة قضايا بتهم قطاع كبير من الأسر المصرية، كل ده في اطار من الكوميديا الاجتماعية الراقية.

بيشهد (ايجار قديم) ظهور مجموعة من الممثلين اللي بنشتاق لأعمالهم زي شريف منير وصلاح عبد الله وميمي جمال وحنان سليمان وعلاء زينهم، وغيرهم من الفنانين، اللي كان ممكن المسلسل يعمل بيهم شغل عالي قوي، لكن شاء صناع المسلسل أنهم يدخلوا على الخط مجموعة فنانين من الأجيال الأحدث علشان يحصل تناغم بين الأجيال، بالتالي شوفنا أداء عظيم من هشام إسماعيل و حازم سمير ورحمة حسن والوجه الجديد الهام وجدي في دور الدكتوره ليلي، والهام رغم أنه دورها الأول، لكنها مش بعيدة عن الوسط الفني، كونها ملكة جمال مصر لسنة ٢٠٠٩ وعارضة أزياء ومهندسة ديكور، والحقيقة أنها قدمت دور أول مميز في المسلسل، بيخلي عندنا ثقة أننا هانشوفها في أعمال كتير قوية قادمة. لو بس اشتغلت أكتر على أن تعبيراتها تكون بعينها وروحها قبل ما تكون بملامح وجهها.

عمرو الدالي مؤلف (ايجار قديم) كان عارف كويس أنه شغال على عمل جماعي، بالتالي وزع في قصته جرعات من الكوميديا – وأحيانًا التراجيديا- على الجميع بدون الانحياز لشخصية عن التانية، ونتيجة ده شوفنا المسلسل متزن والشخصيات مرسومة كويس.

إيجار قديم محاولة موفقة لمناقشة قضايا اجتماعية في قالب اجتماعي أسري، صالح للمشاهدة من كل أفراد الأسرة وبدون شعور بالملل أو الخروج عن السياق.