The Definitive Guide to Living in the Capital , Cairo , Egypt

الصورة الرئيسية: Francisco Andreotti

قليل اللي بيقدروا قيمة الإعلانات الحلوة.. الحقيقة إن الإعلان مش مجرد مشهد دعائي عن منتج أو خدمة، لكنه فن في توصيل رسالة قوية في وقت قصير وبطريقة احترافية. وهنا بتيجي أهمية موسم رمضان، لأنه الوقت اللي الشركات بتتنافس فيه عشان تقدم إعلانات مش بس بتبيع منتجات، لكن كمان بقت جزء من ثقافة المشاهدة زي المسلسلات بالضبط. تعالوا نشوف أهم إعلانات رمضان 2025 كانت عاملة إزاي.

فودافون.. هاتيجي نعيش؟
البداية هتكون مع فودافون، صاحبة الإعلان الأضخم ميزانيةً، واللي قدمت فيه أغنية نانسي عجرم “ماتيجي نعيش”، بمشاركة محمد صلاح وأطفالهم. الإعلان بسيط ومباشر، بيوصل رسالة إننا نعيش اللحظة وما نقلقش من اللي جاي، لأن الأهم هو دلوقتي. وكالعادة، فودافون مش بتعلن عن خدماتها بشكل مباشر، لكنها بترسّخ نفسها كأكبر وأهم براند اتصالات في مصر، بتجمع نجوم الصف الأول في الفن والرياضة.

البنك الأهلي.. الشغل بالـ AI
إعلانات البنك الأهلي دايمًا بتكون من الأجمل، والسنة دي مكملين على نفس السكة، لكن بتوظيف تقنيات حديثة. الإعلان عبارة عن دويتو بين محمد حماقي وويجز، برسالة تحفيزية عن إن أي حد عاوز حاجة، هيقدر يعملها مهما كانت صعبة. الإعلان متعوب عليه وفيه شغل بالذكاء الصناعي، واللي بيضيف له لمسة عصرية مختلفة.

أورانج.. تواصل حتى “لو كل يومين”
أورانج ركزت في إعلانها على فكرة التواصل، وقد إيه مهم إننا نسأل على بعض، حتى لو “كل يومين”، زي ما بتقول الأغنية اللي غناها حسين الجسمي. الإعلان كان تمثيلي بامتياز، بمشاركة نجوم زي أحمد داوود، سلوى محمد علي، وريهام عبد الغفور، مع ظهور خاص لأحمد عز في النهاية. ودي حركة ذكية بتأكد على فكرة إن أورانج مش مجرد شبكة، لكنها جزء من علاقاتنا اليومية.

WE.. حضن دافئ كل سنة
إعلان WE السنة دي بيحمل نفس الرسالة المعتادة، لكنه برضو مؤثر. الأغنية بصوت تامر حسني، والمحتوى كله بيدور حوالين القرب بين الناس، وأهمية التواصل في كل لحظة. الإعلان مش جديد في فكرته، لكنه بيحافظ على نفس أسلوب WE اللي متعودين عليه كل رمضان.

العربي جروب.. رمضان وعيد الأم في إعلان واحد
العربي جروب قرر يضرب عصفورين بحجر واحد، بإعلان ظريف وخفيف عن الأم، بعنوان “يارب يخلي ماما”. الأغنية بسيطة وأجواء الإعلان كلها عائلية ودافئة. خطوة ذكية من العربي اللي بقى يقدم إعلانات Creative جدًا الفترة الأخيرة.

زانوسي.. ملكة الإنجازات

فيه إعلانات عادية.. وفيه إعلان زانوسي.. الصراحة إعلان زانوسي السنة دي كان أكتر من رائع! أولاً، الإعلان جايب مجموعة سيدات بيوت وبيستعرض إنجازاتهم وإزاي زانوسي ساعدهم يوصلوا للإنجاز ده. حلاوة الإعلان إنه مباشر وto the point من غير لف ولا دوران. استخدموا أمهات بمظهر عصري وأنيق، وفي نفس الوقت بيعكس صورة الست المصرية العادية من غير مبالغة. وكمان ربطوا الإعلان بالمستهلك لما أعلنوا عن هاشتاج #ماما_ملكة_الإنجازات، اللي يقدر الأبناء والأمهات يشاركوا عليه إنجازاتهم وممكن يكسبوا أجهزة من زانوسي. وفعلاً، قدموا الإعلان على قناتهم على يوتيوب بأكثر من صيغة (Format) عشان يحافظوا على التنوع ده. برافو زانوسي!

بلبن.. إعلانين مش واحد!
بلبن نزل رمضان بإعلانين، الأول كان الأبرز، مع أكرم حسني في فكرة ذكية عن “اعتذار بلبن”، لكن الاعتذار هنا إعلاني مش حقيقي. الإعلان الثاني كان مع محمد ثروت، وبرغم إنه إعلان كويس، لكن أكرم حسني كان الأقوى. الأزمة الحقيقية إن البعض شاف إن الإعلان مسروق من حملة إعلانية قديمة لعلامة Skittles!

وادي دجلة.. عسيلي وكدواني في دويتو ظريف
وادي دجلة اختار طريقة مختلفة للاحتفال برمضان، من خلال أغنية محمود العسيلي، مع تمثيل خفيف الظل من ماجد الكدواني. الإعلان بسيط لكن مؤثر، ومكمل نفس الروح المرحة اللي بيقدمها وادي دجلة في حملاته.

ليبتون.. التقليدية تسيطر
ليبتون نزل بإعلان عن اللمة، وإنه المشروب اللي بيظبط أي قعدة عائلية. لكن الإعلان تقليدي جدًا، وما قدمش جديد يخلّيه مميز وسط زحمة الإعلانات.

وأخيرًا..

صناع الإعلانات في رمضان 2025 لعب أغلبهم في منطقة الأمان، مافيش حد خد خطوة جريئة خارج الـ comfort zone إلا تجارب قليلة. الشركات بتصرف ملايين، لكن أغلب الميزانية بتروح في أجور الفنانين، مش في الأفكار الجديدة. وده معناه إن أي براند هيجازف ويقدم فكرة مختلفة، حتى لو بسيطة، هيكسب اللعبة، لأن المشاهد وصل لحالة تشبع وبقى عاوز حاجة تكسر الملل!