The Definitive Guide to Living in the Capital , Cairo , Egypt

الصورة الرئيسية: أسامة سليم

من سنين كتيرة وأغاني التترات الخاصة بالأعمال الدرامية بتكون ركن أساسي في نجاح العمل ده، مين يقدر ينسى تترات ” المال والبنون – ليالي الحلمية – زيزينيا “، بعد فترة أغنية أو موسيقى التتر بتبقى حالة فنية منفصلة بتعيش سنين .

السنة دي عندنا تترات كتير حلوة وعجبت الجمهور لكن إحنا حاولنا نختار لكم أفضل عشر تترات في رمضان ٢٠١٨ من ناحية فنية.

قبل ما نبدأ في الكلام عن تترات السنة دي لازم نقول إن مستوى المسلسل مالوش أي علاقة باختيارنا للتتر بتاعه، فيه مسلسلات دون المستوى ولم تحقق أي نجاح لكن التتر كان متميز والناس حبته.

في المركز العاشر: تتر مسلسل جوليا – أغنية ” عم بتغير” لنانسي عجرم

 الأغنية كلمات أحمد ماضي ولحن زياد برجي، والسبب في ضم الأغنية ضمن أفضل عشر تترات في رمضان هو لحنها المتميز لزياد برجي اللي قدم ألحان كتير حلوة وكمان غنى الفترة الأخيرة أغنية ” شو حلو” اللي حققت نجاح كبير في مصر رغم إنها باللهجة اللبنانية، وطبعًا صوت نانسي المناسب جدا للأغنية، كمان لازم نوضح أن المسلسل ده مش مصري، رغم كده الأغنية انتشرت في مصر بشكل جيد خلى الناس تدور على المسلسل وهنا يبان أهمية اختيار أغنية تتر تفيد في انتشار العمل ككل.

المركز التاسع: تتر مسلسل أيوب – عبده سليم

مش بس نجم المسلسل مصطفى شعبان اللي قرر يغير جلده السنة دي ويبعد عن تيمة الراجل المتدين متعدد العلاقات اللي بيقدمها في كل أعماله، معانا كمان تتر مميز غناء المطرب الشاب عبده سليم والحان وتوزيع إسلام صبري وكلمات عماد سالم.

أغنية تتر مسلسل أيوب اتقدمت بشكل الابتهالات الصوفية القريبة للقلب وكمان يحسب للمطرب عبده سليم إنه غنى الكلمات العربية الفصحى بشكل سليم، وبالمناسبة مطرب التتر عبده سليم كان معظم غناه شعبي وقدم ألبوم اسمه “الرزق دا بتاع ربنا” لكنه ما حققش نجاح كبير، عشان كدة التتر ده يعتبر قارب نجاة ليه ولبطل المسلسل.

المركز الثامن: تتر نهاية نسر الصعيد – يعلم ربنا – المطرب أحمد شيبة

بما إن الذوق الشعبي مسيطر آخر كام سنة والناس باختلاف طبقاتها بقت بتحب المهرجانات وأغاني المواويل والأغاني الشعبي المقسوم، ماكنش ينفع نسمع أغنية لأحمد شيبة صاحب الأغنية الشعبية الأشهر في السنين الأخيرة “آه لو لو لعبت يا زهر” وماتكنش الأغنية دي معانا في الترتيب خصوصًا أنها فعلًا مميزة .

أغنية يعلم ربنا كلمات رضا المصري وألحان فارس فهمي، وطبعًا أداء شيبة المميز في كل أغانيه وبدايته بالموال كانت سبب في انتشار الأغنية بشكل كبير لدرجة إنها حققت في أول أسبوعين من طرحها أكتر من عشرة مليون مشاهدة على موقع اليوتيوب.

المركز السابع: تتر مسلسل أمر واقع – اتفائلوا بالخير – ياسمين علي

 على الرغم أن المسلسل ماحققش نسب مشاهدة كبيرة، لكن أغنية التتر بصوت المطربة الصاعدة ياسمين علي كان مميز جدًا والناس أشادت بيه، ياسمين ماقدمتش قبل الأغنية دي غير مقاطع فيديو بصوتها وكانت سبب في شهرتها وانتشارها، خصوصًا أغنية “تقابل ناس” اللي بعدها كلمها شاعر الأغنية تامر حسين وبدأوا التعاون سوا وكانت نتيجته تتر المسلسل.

أغنية اتفائلوا بالخير كلمات تامر حسين وألحان عمرو مصطفى، والاتنين موجودين في رمضان السنة دي بأكتر من عمل ناجح.

 المركز السادس: تتر مسلسل لعنة كارما – آدم

بعيدًا عن المستوى الفني لهيفاء وهبي سواء في التمثيل أو الغناء، فهي بتتميز بالذكاء في الاختيار، ده بيكون واضح في حاجات كتير منهم إنها عمرها ما قررت تغني تتر مسلسل ليها، عارفة ان الحتة دي مش هتنفع فيها، اختيار آدم لغناء التتر موفق جدًا خصوصًا أنه من الأصوات اللي قدمت تترات ناجحة كتير زي تتر مسلسل “العار” قولوا للي أكل الحرام يخاف وتتر ” تحت الأرض” كله بتاع مصلحته، التتر كلمات أحمد المالكي وألحان محمد وزيري وتوزيع محمد مدحت.

المركز الخامس: تتر مسلسل ممنوع الاقتراب أو التصوير – أنغام

 فكرة وجود زينة بطلة لعمل فني شايفين إنها فكرة بدري أوي، وعلى الهامش كدة المسلسل لم يخرج بشكل جيد لأن المخرج كان أول عمل ليه وكان مستعجل وماحضرش كويس، إنما وجود صوت أنغام على تتر المسلسل ماينفعش يمر مرور الكرام، لأنها ببساطة أنغام، أهم مطربة مصرية حاليًا، الأغنية كلمات أمير طعيمة اللي هيكون لينا كلام عليه بعدين وألحان وليد سعد وتوزيع أحمد إبراهيم.

المركز الرابع: تتر مسلسل أبو عمر المصري – شرع السما – حسين الجسمي

التتر المرة دي واخد من حظ المسلسل بشكل كبير، زي ما المسلسل أثار جدل كبير على مستوى الأحداث والأزمات السياسية اللي حصلت بسببه، برضه التتر كان في رأي بعض الناس رائع جدًا وناس تانية شايفاه دون المستوى بالنسبة للي قدمه الجسمي قبل كدة، كلمات التتر للشاعر أيمن بهجت قمر وألحان وليد سعد، وزي ما عندنا زمان سيد حجاب وأحمد فؤاد نجم ملوك الشعر العامي، نقدر نقول إن أيمن بهجت قمر أحد أهم وأكبر الشعراء اللي كتبوا تترات في السنين الأخيرة، قدم لنا ” يتربى في عزو- عباس الأبيض – تتر العار – سكة الهلالي – دلع بنات – بعد الفراق ” كلها تترات لسة بنسمعها لحد دلوقتي بالاضافة لأغاني الأفلام.

المركز الثالث: تتر مسلسل ضد مجهول – اليسا

 ده مش أول تتر تغنيه إليسا لمسلسل بطولة غادة عبد الرازق، قدمت برضه قبل كدة تتر “مع سبق الإصرار”، تميز إليسا الحقيقي مش صوتها أو أدائها القوي قد ما هو في إحساسها بالكلام اللي بتغنيه، وفي الفترة الأخيرة كمان تطورت وبقت تغني ألحان مش سهلة وده يحسب لها جدًا، التتر كلمات تامر حسين وألحان عمرو مصطفى، ودي تاني أغنية معانا في الترتيب للفريق ده.

المركز الثاني: تتر مسلسل طايع – وائل الفشني

في الحقيقة تتر طايع كان ممكن يكون رقم واحد بس للأسف فيه لوحة فنية خدت مكانه، تتر مسلسل طايع ناس كتير شافت إنه شبه تتر “واحة الغروب” اللي قدمه نفس المطرب برضه السنة اللي فاتت، لازم نفرق هنا بين الأغنية والحالة، هنا صناع العمل قرروا يقدموا حالة من الفلكلور الصعيدي اللي قد يبدوا لغير المتعمقين فيه إنه متشابه في الكلمات والألحان لكن ده مش حقيقي، الفلكور الصعيدي والسير الشعبية مليئة بالكنوز الفنية، ويمكن اللي عمل اللخبطة دي إن نفس الصوت هو اللي بيقدم التترين، لكن في الحقيقة وائل الفشني صوته بيضيف لأي عمل فني شارك فيه الفترة الأخيرة خصوصًا الابتهالات والفلكور الصعيدي.

المركز الأول: تتر ليالي أوجيني – نسمة مججوب – عين الغلط

وإحنا بنتابع مسلسل ليالي أوجيني بنحس إننا أمام رسام إيطالي بيرسم لوحة وإحنا بنتفرج على كل تفاصيلها واحدة واحدة ونراقب غصب عننا الألوان واكتمال الرسمة وكل أبعاد اللوحة، في الوقت اللي بنتفرج فيه على رسم لوحة بديعة في الخلفية فيه موسيقى بنحس إنها شغالة في خيالنا، صنعها خيال كل واحد فينا عشان يقدر يستمتع أكتر باللوحة دي.

تتر مسلسل ليالي أوجيني غناء نسمة محجوب والأهم إنه ألحان هشان نزيه، هشام نزيه بنعتبره أهم صانع موسيقى تصويرية في مصر آخر كام سنة، الملحن الموسيقي اللي قدم لنا في أول حياته موسيقى فيلم هيستريا لأحمد زكي وموسيقى أعمال كبيرة زي موسيقى فيلم السلم والثعبان والساحر وفيلم الكنز والأصليين ومسلسل أفراح القبة والعهد، قدر هنا هشام يوظف صوت نسمة محجوب الرائع داخل المعزوفة اللي قدمها ليخرج لنا شكل كلاسيكي فيه تناسق وتناغم كبير مع شكل المسلسل اللي بتدور أحداثه في الأربعينيات.