The Definitive Guide to Living in the Capital , Cairo , Egypt

السنة اللي فاتت شوفنا الموسم الأول من مسلسل أشغال شقة، والحقيقة إنه عجبنا جدًا، وكان في رأينا، واحد من أحسن المسلسلات الكوميدية في رمضان. السنة دي في رمضان 2025 بنشوف استكمال لنفس النجاح اللي حققه الموسم الأول، على الرغم من خوفنا من إن الفكرة تكون استُهلكت، لكن هشام ماجد، مصطفى غريب، وباقي فريق العمل أثبتوا لنا إن التكرار ممكن يحقق نفس النجاح.. وأكتر.

أحداث الموسم الجديد بتستكمل من نهاية الموسم السابق، لكن لو ماشوفتش الجزء اللي فات تقدر تتفرج على الجزء ده عادي من غير مشاكل في فهم الأحداث. بنشوف الطبيب الشرعي حمدي (هشام ماجد) ومراته ياسمين (أسماء جلال) في مواقف كوميدية جديدة، لما بيقرروا يعينوا حد معاهم في الشقة يساعدهم في شغل البيت. نفس السيناريو اللي كتبه خالد وشيرين دياب، لكن المرة دي مع مواقف كوميدية أكتر.

في رأينا، المرة دي المواقف الكوميدية مكانتش نابعة بالأساس من الشغالات اللي بيتم الاستعانة بيهم، لكن من شخصية عربي (مصطفى غريب)، اللي كان شايل لوحده 60% تقريبًا من كوميديا الأحداث، سواء بالإيفيهات أو المواقف المختلفة. أما لو هانتكلم عن الشغالات، فالحلقات الأولى اللي ظهرت فيها شخصية مدينة من نيجيريا عملت لنا بجد صراخ من الضحك، والحقيقة إن إسلام مبارك، الفنانة السودانية اللي قامت بالدور، عملته بأفضل ما يكون، ونتوقع إن دورها هايكون بداية انطلاق لها في أعمال تانية قادمة.

في أشغال شقة جدًا، تمت زيادة مساحة دور درية، والدة الدكتور حمدي (الفنانة شيرين)، واللي لعبت هي كمان دور الحماة المتسلطة بشكل كويس وكوميدي جدًا، أما دكتور عصام (محمد عبد العظيم) فكان خطير في تجسيد دور الطبيب الشرعي اللي بيتحمل كل المصايب اللي بيحطها عليه الثنائي هشام ومصطفى غريب.

هشام ماجد بيثبت يوم بعد يوم إنه حصان كوميدي منطلق بقوة غير عادية، وفي رأينا هو تفوق في الموسم ده على أكرم حسني في مسلسل الكابتن، اللي لعب كوميديا من المنطقة المُعتادة اللي ممكن تخلينا مبتسمين أحيانًا، لكن مش بتخلينا واقعين على الأرض من الضحك زي ما حصل مع أشغال شقة.

ولأن الكوميديا الحلوة دايمًا بتجيب معاها مشاكل كتير لإنها بتخبط في (الحلل) طول الوقت، شوفنا اعتراضات كتير على المسلسل وبعض الشخصيات اللي ظهرت فيه، زي شخصية مدينة اللي ممكن بعض المشاهدين يشوفوا فيها حالة من التنمر، أو شخصية سناء اللي قامت بيها فدوى عابد واللي أثارت تحفظ برضه من البعض.

أسماء جلال صاحبة الإطلالة الجميلة، السيناريو حاول يديها مساحة للكوميديا أكتر من مرة، لكن أداؤها كان أقل من توقعاتنا بكتير، يمكن علشان محاطة دايمًا بحيتان كوميديين زي هشام ماجد ومصطفى غريب. لكن برضه كان عندنا توقعات أعلى بخصوصها.

بيعيب المسلسل من وجهة نظرنا إن إيقاعه، اللي كان سريع جدًا في الأول، كان أحيانًا بيكون بطيء، مع بعض الشخصيات زي انتصار أو ناهد السباعي. كمان بعض المواقف الكوميدية، زي ما قولنا، ممكن تكون مثيرة للاشمئزاز، زي حلقة تحليل البول، أو بعض الإيفيهات اللي كان فيها تلميحات جنسية أو تلميحات لشتايم مش كويسة. لكن هي كده دايمًا الكوميديا، علشان توقّعك من الضحك مش هايبقى دايمًا ماشي مع قواعد الأدب والأخلاق.

أشغال شقة جدًا هو موسم تاني واعد جدًا، وفي رأينا إنه أكيد مكمل معانا للموسم الثالث، ونتمنى إنه يكون على نفس القوة من الكوميديا وأكتر كمان، مع مواقف جديدة ونجاح جديد بإذن الله.