The Definitive Guide to Living in the Capital , Cairo , Egypt

مواهب كتيرة وحلم كبير عند الأطفال الصغيرين، مواهب محتاجة نجم يرعاها.. محتاجة تطلع للنور والناس تعرفها ويشوفوا نفسهم كبار بعد كده، الموضوع كله عن الحلم وإزاى نساعد الصغيرين يحلموا ويحققوا حلمهم.

برنامج The Voice kids هو البرنامج اللى هـ يحقق حلم الصغيرين، مع ثلاثة من أهم نجوم العالم العربى، قيصر الأغنية العربية كاظم الساهر، ومغنى الشباب تامر حسنى، وبنوتة الأغنية العربية نانسى عجرم.

اختيارات المحكمين جيدة علشان كاظم عنصر الخبرة فى الموضوع، يعنى فى الغناء والتحكيم كاظم يكسب المركز الأول، ونانسى كمان تكسب بعده على طول علشان هى أكثر واحدة اهتمت بالأطفال وعملت ألبوم كامل لهم، واشتهرت أغانيها.. أما تامر حسنى فهو المغنى الشاب المعروف فى التمثيل والغناء لكن فى التحكيم شوية لاقيينه أنه تايه ما بين خبرة كاظم وطفولة نانسى فى التعامل مع الأطفال.

فى البرنامج هـ نشوف كراسى ومسرح وتجهيزات وإضاءة وصوت ومايك.. وبـ يطلع الأطفال علشان يقولوا اللى عندهم ويسيبوا أثر عند اللجنة اللى هـ تحكم بعد كده وتفضل تصفى ما بينهم لحد ما يطلع الفنان اللى عاوزينه.

لكن إيه بقى الفكرة بتاعة البرنامج وليه معمول علشان الأطفال؟

فكرة البرنامج أنه بـ يختار أطفال من سن 7 لحد 14 سنة علشان يؤهلهم يبقوا مغنيين معروفين بعد كده، وهو مأخوذ من برنامج أجنبى بنفس الاسم واللوجو وكل حاجة (النسخة العربى) وفكرته قائمة على الأغنية الأولى للطفل على المسرح (مرحلة الصوت وبس) وبـ يسمع الحكام الثلاثة أغانى من اختيار الأطفال، واللى يعجبه الصوت يلف بالكرسى بتاعه وده معناه أنه موافق على ضم الصوت ده لفريقه، لو لف الثلاثة يختار الطفل ما بينهم (نفس فكرة ذا فويس بتاع الكبار).

بعد كده بـ يبدأوا يعملوا تصفية سريعة ويجمعوا فريقهم، كل فنان بـ يجمع فريقه ويدربه على كل حاجة: الصوت، الأداء، الوقفة، المخارج، الألحان، وبـ يعملوا مواجهة يختاروا منها موهبتين بس علشان يتواجهوا ثانى فى حلقة اسمها Sing off، وبعدها بـ يتأهل أحسن موهبة للعرض المباشر الأخير وفيه بـ يتم اختيار أحلى موهبة صغنونة على مسرحThe Voice kids.

البرنامج من تقديم نفس المذيعة اللى قدمت برنامج The Voice للكبار (إيميه صياح) واللى مسؤول عن الكواليس واللى بـ يحصل فيها هو الممثل المصرى مؤمن نور، ويلا نتابع رحلة الحب والجمال والفطرة والصوت الحلو والعياط والضحك مع أحلى أطفال صغيرين.