The Definitive Guide to Living in the Capital , Cairo , Egypt

من أهم المعارض المتميزة لمنتجات الهاند ميد هو معرض ديارنا، واللي بيضم مجموعة من أمهر صغار الصنايعية المتميزين في مجالاتهم، والسنة دي المعرض انطلق بالتزامن مع معرض زهور الربيع 2025، وبيقدموا مجموعة متنوعة من منتجات الهاند ميد سواء عن طريق جمعيات أو أفراد، وخلال السطور اللي جاية هنقولكم على كل التفاصيل اللي محتاجين تعرفوها عن المعرض.

المعرض بيتقام داخل المتحف الزراعي بالدقي وبالتزامن مع معرض زهور الربيع، وبيضم عارضين من مؤسسات خيرية مختلفة ومستقلين، ومواعيد الزيارة من 10 صباحًا لحد 10 مساءً، ومستمر لحد 12 مايو 2025، وسعر تذكرة الدخول 10 جنيهات، والسيارة 25 جنيه، وتقدروا توصلوا للمتحف عن طريق المترو وأقرب محطة مترو هي الدقي، أو عن طريق المواصلات العامة اللي بتعدي على شارع التحرير وتتمشوا لمدة 9 دقايق، وكمان ممكن تستخدموا أي مواصلة بتمر على شارع البطل أحمد عبد العزيز هتنزلكم قدام المتحف، أو تيجوا بعربيتكم الخاصة.

هتلاقوا جوه معرض ديارنا لوحات فنية مرسومة برمل الواحات بألوانه الطبيعية بأسعار بتبدأ من 250 جنيه، وكمان هتلاقوا منتجات خان الخليلي وإكسسوارات “علاجية” بأسعار بتبدأ من 35 جنيه، ومنتجات خوص ومكرمية وقماش بأسعار بتبدأ من 45 جنيه.

كمان هتلاقوا منتجات فخار بأسعار بتبدأ من 75 جنيه، وكريستال من 250 جنيه، وكليم بـ225 جنيه، وشموع فواحة بداية من 25 جنيه، ومنتجات خيش ودِك وكيروشن بأسعار بتبدأ من 200 جنيه، وكمان هتلاقوا منتجات نوبية ومقرمشات مختلفة، ومنتجات غذائية إنتاج وزارة الزراعة زي المخللات والعسل والزيت وخلافه، بأسعار بتبدأ من 50 جنيه.

المميز في المهرجان إنكم هتلاقوا محاربات سرطان تابعين لمؤسسة بهية، موجودين بشغلهم اللي اتدربوا عليه، وعندهم منتجات مكرمية وخيوط قطن وإكسسوارات وخرز وستانلس ومفروشات وكروشيه قطن وصوف وجلود وخيش، وأسعارهم بتبدأ من 200 جنيه، وإحنا بندعمهم وبنطلب منكم تدعموهم بشدة.

معرض ديارنا لمنتجات الهاند ميد موجود فيه كمان منتجات أورجانيك زي الزيوت الخام وسعرها بيبدأ من 195 جنيه، وعسل نحل من 150 جنيه، وعبوات طحينة سمسم من 190 جنيه، وزيت الزيتون بسعر 425 جنيه.

وهتلاقوا كمان منتجات ديكور لتقديم الشاي والقهوة وكوسترات بأسعار بتبدأ من 20 جنيه، ومصنوعة من الخشب والزجاج، ومنتجات نوبية مصنوعة من الخيط والخرز والخشب بأسعار بتبدأ من 25 جنيه، ومن ضمن العارضين كان محمد عبد الله من ذوي الهمم، واللي بينتج ديكورات خشب سواء لوحات أو علب مجوهرات مميزة بأسعار بتبدأ من 200 جنيه.

كمان هتلاقوا مجات شاي ونسكافيه مرسومة باليد بأسعار بتبدأ من 250 جنيه، والنوت بوك بداية من 40 جنيه، ده غير ديكورات للعرائس الخشب بأسعار بتبدأ من 60 جنيه، والشنط الجلد الطبيعي والمحافظ اللي بتبدأ من 250 جنيه.

أما الديكورات المشغولة من النحاس فأسعارها بتبدأ من 100 جنيه، والخواتم من 30 جنيه، وفيه منتجات فخار موجودة سادة بداية من 40 جنيه وتقدروا تلونوها، أو تاخدوها مرسومة بـ50 جنيه، وفيه قسم لمنتجات من السودان الشقيق بيضم مختلف المنتجات سواء في الديكور أو الحلويات أو المشغولات الجلدية والقماش ومستحضرات التجميل وغيرها بأسعار متفاوتة ومختلفة.

كمان هتلاقوا شغل خيامية مميز بأسعار بتبدأ من 100 جنيه، وشغل كليم بسعر بيبدأ من 450 جنيه، وديكورات خشب زي الساعات والبراويز والألواح والرسومات وغيرهم بأسعار بتبدأ من 150 جنيه، ومنتجات من سيوة زي أباجورات الملح أسعارها بتبدأ من 200 جنيه، والصايون سعره 50 جنيه، وكوسترات خشب زيتون بـ60 جنيه، ومنتجات خوص من 150 جنيه، وشنط كتان بسعر بيبدأ من 75 جنيه.

كمان هتلاقوا منتجات ريزين بتبدأ من 50 جنيه، وخطابات معمولة هاند ميد مصنوعة بحب بسعر 120 جنيه، وفخار أبيض أو مرسوم أسود للتلوين بسعر بيبدأ من 50 جنيه.