The Definitive Guide to Living in the Capital , Cairo , Egypt

سعيد محمود

في الأيام دي الكل بيفكروا يدبر فلوس إزاي عشان يقدر يلبي احتياجاته لو عايش لوحده، أو احتياجات بيته لو متجوز، ولو اتكلمنا عن فكرة الادخار هنلاقي كتير فاكرين إن اللي بيحَوِّش ده هو اللي بيقبض مرتب كبير، بس ده مفهوم غلط، لأن أي حد يقدر يغير حياته المالية ويبدأ في الادخار لو عايز.

وفي الموضوع ده هنقول لك على شوية نصائح وخطوات ممكن تغير حياتك وتعديك من أزمات مالية كتير جدًا أو تجنبك الوقوع فيها من الأساس، ده طبعًا لو إنت هتقدر تنفذها.

من أهم طرق الادخار طريقة “ادفع لنفسك أولًا”، ودي بينصح بيها المخطط المالي والمدرب في جامعة كاليفورنيا صموئيل راد، وهي قائمة على إنك تستغنى كل شهر عن جزء من مرتبك ولو قليل، وتحطه على جنب قبل ما تبدأ تصرف المرتب على احتياجاتك، وده ممكن يتم بالطرق اللي هنشرحها لك.

حساب التوفير

عشان تلزم نفسك بالموضوع ده ممكن مثلًا تفتح حساب توفير في نفس البنك اللي بينزل مرتبك عليه، وتتفق مع إدارة البنك على اقتطاع جزء من المرتب ووضعه في الحساب ده بمجرد نزول المرتب.

إزاي تكسب من عاداتك السيئة

الطريقة دي هتساعدك إنك تحَوِّش وتتخلص من عاداتك السيئة في نفس الوقت، وهي باختصار إنك تدفع لنفسك غرامة -خمسة جنيه مثلًا- على كل حاجة غلط تعملها أو عادة سيئة مش عارف تبطلها، بس طبعًا لازم تكون صارم مع نفسك في تطبيق الموضوع ده ومتكسلش فيه، وتخيل بقى هتدفع فلوس قد إيه كل يوم.

اشتري وحَوِّش

الطريقة دي هتساعدك على التقليل من الشراء لو كنت من الناس اللي عندها إدمان في شراء أي حاجة، وهي إنك تحاول تحط على جنب ولو حوالي 10% من قيمة أي حاجة تشتريها،  يعني لو اشتريت تليفون جديد أو لبس مثلًا شيل النسبة دي على جنب، وكرر الموضوع كل ما تشتري أي حاجة، وفي آخر الشهر هتلاقي معاك مبلغ محترم.

قاعدة الـ 10%

المرة دي هتشيل الـ 10% بس مش من اللي هتشتريه، هتشيله من مرتبك مهما كان المبلغ، وممكن تبدأ الموضوع ده تدريجيًا، يعني مثلًا تحَوِّش 1% أول شهر، وبعد كده 2%، وتزود النسبة كل شهر لحد ما توصل لـ 10%.

حوش على مراحل

الطريقة دي بتتلخص في إنك تحَوِّش مبلغ كل أسبوع، يكون أكبر من الأسبوع اللي قبله، يعني مثلًا في الأسبوع الأول من السنة 5 جنيه، وفي الأسبوع الثاني 10 جنيه، ثم 15 جنيه، وتفضل تزود كل أسبوع لحد ما توصل لـ 260 جنيه في الأسبوع الأخير من السنة، وبكده يبقى معاك آخر السنة 6890 جنيه، وطبعا مثال الـ 5 جنيه ده عشان نقرب لك الموضوع، لكن إنت تقدر تبدأ بمبلغ أكبر طبعًا.