صُنعت بحب.. 5 أماكن تقدروا تشتروا منهم أحلى هدايا “هاند ميد”
أعمال فنية تسوق جلود حرف يدوية شغل نحاس هاند ميد هدايا هاند ميد
Mohamed Talaat
الهدية حاجة جميلة، بتخلي حياتنا أجمل، ومافيش أجمل من أنكم تهادوا حد بهدية مصنوعة مخصوص علشانه، واللي بتكون الخامة الرئيسية فيها “معمولة بحب”، وفي السطور الجاية، هنقولكم على 5 أماكن تقدروا تشتروا منهم أحلى هدايا “هاند ميد” وكمان هتوصلكم لحد البيت.
Rokallery
عندهم شغل “هاند ميد” مميز، ومتخصصين في كل شغل الأحجار الكريمة، وتنفيذ الهدايا دي بيكون بالطلب، والأسعار عندهم بتبدأ من 50 جنيه وبتوصل لحد 150 جنيه، وده للأحجار العادية، أما أحجار العقيق واللولي الطبيعي فبتكون أغلى بكتير وبتبدأ من 200 جنيه، وكمان بيعملوا تصاميم مطلية بلاتين وذهب، والسلسلة الواحدة بيبدأ سعرها من 165 جنيه، والأنسيال بيبدأ سعره من 150 جنيه، والميدالية بتكون بـ235 جنيه، وكل المنتجات بتكون من النحاس المطلي، اللي سمكه 1.5 مللي.
تقدروا تتواصلوا معاهم من خلال صفحة الفيسبوك من هنا.
أو على الجروب بتاعهم من هنا.
دكان الفنانين
الحقيقة إنهم فنانين بجد! بيعملوا شغل جلود طبيعية زي المحافظ والشنط بأسعار بتبدأ من 100 جنيه، وكمان عندهم شغل نحاس على أحجار وخواتم وغيرها والأسعار بتبدأ من 35 جنيه، كمان عندهم شغل “هاند ميد” خرز وخيوط وغيرها بأسعار بتبدأ من 35 جنيه.
وتقدروا تتواصلوا معاهم من خلال صفحة الفيسبوك من هنا.
F.Nawar leather
دول بيشتغلوا في منتجات الجلود الطبيعية واللي بيعملوا منها محافظ بيبدأ سعرها من 150 جنيه، وشنط سعرها بيبدأ من 300 جنيه، وكمان عندهم أحزمة وغيرها من منتجات الجلود، ده غير شغلهم الخاص بالتطريز، واللي بيكون كله “هاند ميد” 100%، وبيتعمل من قماش خيامية أو حرير و خيط فرنساوي DMC وسعر اللوحة التطريز بيبدأ من 150 جنيه.
وعلشان تطلبوا من عندهم أو تشوفوا منتجاتهم أدخلوا على صفحة الفيسبوك من هنا.
Mensho Handmade Designs
شغلهم مختلف شوية، وبيعملوا معظمه من الصلصال الحراري، وعندهم إكسسوارات وميداليات، وكمان بيزينوا الماجات، وأي حاجة سيراميك، ودول ناس بيهتموا بالتفاصيل جدًا، شغلهم بيدخل الفرن، وبعدين بيدهنوه ويلمعوه حسب كل شكل، وأسعارهم بتبدأ من 150 جنيه للميدالية، و200 جنيه للمج.
تواصلوا معاهم من هنا.
Crochet By Mora
دول بقى بيعملوا كل حاجة كروشيه، فساتين ولبس أطفال بأسعار بتبدأ من 100 جنيه، وإسكارفات سعرها 110 جنيه، وآيس كاب كبار بـ70 جنيه، وللأطفال بـ40 جنيه، وعندهم كمان جواكت وبلوزات حريمي أسعارها بتبدأ من 300 جنيه، وشنط بيبدأ سعرها من 110 جنيه، وكله من الصوف التركي.
وتقدروا تتعرفوا على شغلهم من جروب الفيسبوك هنا.
ونصيحتنا في كايرو 360 أنكم قبل ما تشتروا أي حاجة أو تتفقوا على هدية لازم تتأكدوا من الخامات والأسعار والكواليتي والشكل المطلوب، ولو لقيتوا أن الطلب اللي وصلكم مختلف عن اللي طلبتوه بلاش تستلموه، ومن واقع خبرتنا في مجال الشحن بنقولكم ماتدفعوش أكتر من 40 جنيه داخل القاهرة و50 جنيه لو أنتم في المدن الجديدة.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
