The Definitive Guide to Living in the Capital , Cairo , Egypt

رنا شرف      

شم النسيم يعني يوم لطيف وظريف بيعدي علينا بجو وطقوس جميلة، منها مثلًا تلوين البيض وأكل الرنجة والفسيخ، ودي عادة بيبقى ليها طعم تاني خالص في اليوم ده، وبالمناسبة دي جبنا لكم مكان مميز جدًا في القاهرة، بنعتبره من أجمد الأماكن في بيع الرنجة والفسيخ، وهو شاهين الفسخاني، تعالوا نتعرف عليه أكتر ونعرف أسعاره.

“شاهين” من أقدم المحلات في المجال د في العاصمة المصرية، ومشهور جدًا في السيدة زينب، وله جمهور كبير بيثق فيه، والمكان علي طول زحمة، ولإنه في منطقة شعبية جميلة ومحببة لكتير مننا، بيفضل شغال طول السنة بنفس زحمة الأعياد.

ولما تروح المحل هتلاحظ إن جمهوره من كل الطبقات، وكمان من محافظات كتير، يعني مش بس من القاهرة أو حي السيدة زينب.               

 أول ما وصلنا المكان لاحظنا الزحمة الشديدة اللي عليه، ورغم إن المحل مش كبير في حجمه، إلا أن عدد كبير من الناس بتثق فيه، وده أمر جميل.

قائمة الأسعار

طلبنا نعرف الأسعار في المكان، وعرفنا إن كيلو الرنجة عنده 85 جنيه, أما الرنجة المتنضفة بالزيت فسعرها 100 جنيه, والفيليه 500 جرام سعره 65 جنيه, والرنجة برطمان فيليه 700 جرام سعرها 75 جنيه.

عرفنا كمان إن سعر البطارخ البوري 100 جرام 180 جنيه، وكيلو السردين 80 جنيه.

نيجي للفسيخ بقي؛ كيلو الفسيخ ملح مظبوط 210 جنيه، وكيلو فسيخ ملح خفيف 210 جنيه، وسعر الفسيخ المتنضف بالزيت230 جنيه، وكيلو الملوحة 180 جنيه.

لما جربنا المنتجات لقيناها فعلًا متميزة، وحبيناها جدًا، وبننصحكم دائمًا تشتروا كميات قليلة لإن أكل كميات كتيرة من الرنجة أو الفسيخ أمر مش صحي، ومهم كمان يكون مع الوجبة ليمون وبصل علشان ده بيساعد على إن الأكلة تكون صحية أكتر.

العنوان: 45 ميدان السيدة زينب، أمام مسجد السيدة زينب، صفحتهم على الفيسبوك.

أكيد هنزور المكان تاني، وكل سنة وأنتم بخير وسعادة يا أهل القاهرة الكرام.