The Definitive Guide to Living in the Capital , Cairo , Egypt

معلوماتنا عن عالم النباتات والأزهار محدودة لدرجة أننا لما بـ نبقى عندنا مناسبة وعاوزين نشتري ورد بـ نكسل، بس علشان حاسين أننا داخلين على عالم مبهم تمامًا، مش بـ نبقى عاوزين نشتري بوكيه جاهز والسلام، لأ بـ نبقى عاوزين نبقى زي المحترفين اللي بـ يروحوا ينقوا وردة وردة وعود عود، ونبقى فاهمين أسماء الأزهار ودلالتها وموطنها الأصلي، لكن قبل ما نوصل للمرحلة أكيد هـ تيجي مناسبات لازم نجيب فيها ورد، وعلشان كده قررنا نخوض تجربة زيارة أحد محلات الورود ونسأل كل الأسئلة اللي ممكن يسألها واحد مش بـ يفهم أي حاجة في موضوع الورد ده.

زرنا محل «سبرينج فلاورز – Spring Flowers» الموجود في بداية شارع مصدق من ناحية ميدان الدقي، محل صغير موجود على الصف اللي في أول محطة بنزين التعاون، وسهل تشوفه من بعيد بكل الشجيرات والأصاري اللي حاطتها خارج المحل.

دخلنا نتفرج على الورد المعروض اللي ما كانش كثير قوي لحسن الحظ علشان نعرف نسأل عن حاجات محددة. المحل فيه حوالي 20 نوع من الزهور مرصوصين حسب اللون والمنشأ، البلدي هو الغالب طبعًا، والمميز عند «سبرينج فلاورز» أنه بـ يبيع بأسعار رخيصة مقارنة بمحلات ثانية سألنا فيها بعد كده، وده لأنه عنده المشاتل والمزارع بتاعته بـ يجيب الورد منها، صحيح مش بنفس جودة المستورد اللي شوفناه هناك، لكن أسعاره مغرية جدًا.

الجلاديولس والليليان والأرولة والفريسيا، أسماء طبعًا يعرفها المتخصصين، لكن إحنا لوحدنا عرفنا القرنفل وعباد الشمس والفل والياسمين والتيوليب، ودي فعلًا أكثر زهور بـ تُباع زي ما وضح لنا مدير المحل. الزهور بـ تُباع بالعود، العود بـ يبقى فيه زهرتين أو أكثر وشوية أوراق خضراء، العود بـ يتراوح من 2 جنيه لحد 5 جنيه في الأنواع البلدي أو المحلي، الورد الأحمر الهولندي العود فيه بـ 8 جنيه، وعلشان تعمل بوكيه لطيف حجمه صغير من غير أصرية هـ تحتاج مثلًا 20 عود من أنواع مختلفة بـ تختراها على ذوقك، وممكن تختار بوكيهات جاهزة بـأسعار من 50 جنيه لحد 200 جنيه، وكل ما الحجم بـ يزيد ده بـ يحتاج أصرية ولو صغيرة تشيله فيها، والمحل بـ يغلفها بطريقة شيك مناسبة للمناسبة اللي هـ تستخدمه فيها. فيه زهور مجففة ودي موجودة في بوكيهات جاهزة ما شوفنهاش معروضة بشكل منفصل، البوكيه بـ يبدأ من 150 جنيه وبـ يوصل لـ 300 جنيه، بـ يبقى فيه ألوان وقورة وغامقة أكثر، والزهور فيها بـ تبقى شكلها أقرب للحبوب المجففة، بس عجبنا جدًا لدرجة أننا افتكرناه نباتات صناعية.

مش بس ممكن تشتري، ممكن كمان تأجر شجيرات وأصاري زرع بالواحدة لو عندك مناسبة ليوم واحد أو عدة أيام، في الحالة دي بـ تتحسب بسعر الجملة، يعني لو هـ تأخذ 5 أصاري مثلًا كبيرة مع شوية زهور ولمبات صغيرة علشان تزين شقة أو مدخل فيلا هـ تدفع على الإيجارات 200 جنيه مثلًا لكن الزهور لازم تشتريها لأنها بـ تذبل وممكن تتلف بفعل المشوار، فأكيد مش هـ تتأجر. ممكن تتفق مع إدارة المحل أن حد ييجي يعاين المكان ويحدد هو هـ يحتاج قد إيه للديكور والزينة، وتتفق على كل حاجة قبل المناسبة اللي عندك بيوم واحد، وممكن تعمل طلبيات كبيرة أو صغيرة بالتليفون بس بشرط تبقى عارف أنت عاوز إيه بالضبط. محتاجين شوية مذاكرة وكام زيارة لمحلات زهور ثانية علشان نعرف معلومات أكثر ننقلها لقراء كايرو 360، نوعدكم نعمل ده الفترة اللي جاية.